കറന്റ് പോയാല് പെട്ടെന്ന് തന്നെ നമ്മള് ഇലക്ട്രിസിറ്റി ഓഫീസിലേക്കു വിളിച്ചു കാര്യം പറയുന്നു. അവിടെ നിന്നും ആളുവന്നു തകരാറുകള് മനസ്സിലാക്കി പരിഹരിക്കുന്നു. ഇവിടെ നമ്മള് ലൈന്മാനെ പ്രതീക്ഷിച്ചിരിക്കുമ്പോള് ഇനി മുതല് നമ്മുടെ മുന്നിലേക്കെത്തുന്നത് ലൈന് വിമനായിരിക്കും. കേള്ക്കുമ്പോള് അതിശയം തോന്നാമെങ്കിലും കാര്യം ഉളളതു തന്നെയാണ്. പോസ്റ്റില് കയറുന്നതും ലൈനിലെ തകരാറുകള് തീര്ക്കുന്നതും പുരുഷന്മാര്ക്ക് മാത്രം സാധ്യമാണെന്ന് കരുതിയെങ്കില് തെറ്റി. ഇനിമുതല് ഈ മേഖലകളിലേയ്ക്ക് സ്ത്രീകളുമുണ്ട്. ലൈന്മാന് ചെയ്യുന്നത് പോലെ തന്നെ എല്ലാ കാര്യങ്ങളും ചെയ്യാന് ലൈന്വിമനും സാധിക്കുമെന്ന് തെളിയിച്ചിരിക്കുകയാണ് തെലുങ്കാനയിലെ രണ്ട് പെണ് പുലികള്.
ബബൂരി സിരിഷ, വി ഭാരതി എന്നീ രണ്ടു യുവതികളാണ് തെലങ്കാന സതേണ് പവര് ഡിസ്ട്രിബൂഷന് കോര്പ്പറേഷന് ലിമിറ്റഡ് നടത്തിയ ജൂനിയര് ലൈന്മാന് റിക്രൂട്ട്മെന്റ് പരീക്ഷ പാസായി പുതിയ ജോലിയില് പ്രവേശിച്ചിരിക്കുന്നത്. രണ്ട് വര്ഷം മുമ്പാണ് ഇരുവരും ജോലിയ്ക്ക് അപേക്ഷ നല്കിയത്. എന്നാല് സ്ത്രീകള്ക്ക് ഈ ജോലി അപകടമാണെന്നും പതിനെട്ട് അടി ഉയരമുള്ള വൈദ്യുത തൂണ് കയറേണ്ടിവരുന്നത് സ്ത്രീകള്ക്ക് ബുദ്ധിമുട്ടേറിയ കാര്യമായതിനാല് ലൈന്വുമണായി സ്ത്രീകളെ നിയമിക്കാന് കഴിയില്ലെന്നും ടി എസ് എസ് പി ഡി സി പറഞ്ഞു.
അപേക്ഷ നിഷേധിക്കപ്പെട്ടു. എന്നാല് അവര് പിന്മാറാന് തയ്യാറായില്ല. ഇലക്ട്രീഷന് വിഭാഗത്തില് ഐ ടി ഐ പൂര്ത്തിയാക്കിയ എട്ട് സ്ത്രീകള് ഇതിനായി ഹൈക്കോടതിയെ സമീപിച്ചു. തുടര്ന്ന് അതിനുള്ള അനുമതി നേടിയെടുക്കുകയും ചെയ്തു.
കഴിഞ്ഞ വര്ഷം ഡിസംബര് ഡിസംബര് 23 നാണ് ബബൂരി സിരിഷയും വി ഭാരതിയും പോള് ടെസ്റ്റ് പൂര്ത്തിയാക്കിയത്. ഇതോടെ ചരിത്രം സൃഷ്ടിച്ചു കൊണ്ട് ലൈന്വിമനായി സമൂഹത്തിലേക്ക് ഇറങ്ങി. പുതിയ തലമുറയിലെ പെണ്കുട്ടികള്ക്ക് ഇവര് ഒരു പ്രചോദനം തന്നെ എന്ന് പറയാതിരിക്കാനാവില്ല.
