കൊച്ചി: നടൻ സുരേഷ് ഗോപിയും സംവിധായകൻ ജോഷിയും വീണ്ടും ഒന്നിക്കുന്ന പുതിയ സിനിമയുടെ പ്രഖ്യാപനം തിങ്കളാഴ്‌ച്ച. രാവിലെ 11.05 നാണ് സിനിമയുടെ പ്രഖ്യാപനം നടക്കുക. സുരേഷ് ഗോപി തന്റെ ഫേസ്ബുക്ക് പേജിലൂടെയാണ് വിവരം അറിയിച്ചത്. മാസ്റ്റർ ക്രാഫ്റ്റ്മാൻ ജോഷിയുമായി വീണ്ടും ഒരുമിക്കുന്ന സന്തോഷം ഏറെയാണ് അദ്ദേഹം ഫേസ്ബുക്കിൽ കുറിച്ചു.
സുരേഷ് ഗോപിയുടെ 252 -ാം ചിത്രമാണിത്. ആർ കെ ഷാൻ, ജേക്ക്‌സ് ബിജോയ്, അജയ് ഡേവിഡ് കാച്ചപ്പള്ളി, ഡേവിസ് കാച്ചപ്പള്ളി എന്നിവരുൾപ്പെടെ നിരവധി പ്രമുഖർ ചിത്രത്തിന്റെ അണിയറയിലുണ്ട്. പൊറിഞ്ചു മറിയം ജോസിന് ശേഷമെത്തുന്ന ജോഷി ചിത്രമായതിനാൽ ആരാധകരും ഏറെ പ്രതീക്ഷയിലാണ്.
നരിമാൻ, ലേലം, ട്വന്റി ട്വിന്റി, ക്രിസ്ത്യൻ ബ്രദേഴ്‌സ്, വാഴുന്നോർ എന്നിങ്ങനെ നിരവധി ഹിറ്റു ചിത്രങ്ങൾ സുരേഷ് ഗോപിയ്‌ക്ക് സമ്മാനിച്ച സംവിധായകനാണ് ജോഷി. ഏഴു വർഷത്തെ ഇടവേളയ്‌ക്ക് ശേഷമാണ് ഇരുവരും വീണ്ടും ഒന്നിക്കുന്നത്. 2014 ൽ ഇറങ്ങിയ സലാം കാശ്മീർ എന്ന ചിത്രത്തിലാണ് ഇരുവരും അവസാനമായി ഒരുമിച്ച് പ്രവർത്തിച്ചത്.
