ലോകത്തില് ഏറ്റവും കൂടുതല് ആളുകള് ഉപയോഗിക്കുന്ന മൊബൈല് അപ്ലിക്കേഷനുകളില് ഒന്നാണ് വാട്സ് ആപ്പ്. അതുകൊണ്ടു തന്നെ ഉപഭോക്താക്കള്ക്കായി വിവിധ തരത്തിലുള്ള നിരവധി പുതിയ അപ്ഡേഷനുകള് വാട്സ് ആപ്പ് കൊണ്ടു വരാറുമുണ്ട്. അത്തരത്തില് പുതിയ ഒരു സംവിധാനവുമായാണ് ഇപ്പോള് വാട്സ്ആപ്പ് ഉപഭോക്താക്കളിലേക്ക് എത്തിയിരിക്കുന്നത്. വാട്സ്ആപ്പ് വീഡിയോകള് മ്യൂട്ട് ചെയ്യുന്നതിനുള്ള ഓപ്ഷനാണ് ഇപ്പോള് പുതിയതായി വാട്സ് ആപ്പ് അവതരിപ്പിച്ചിരിക്കുന്നത്. ട്വിറ്ററിലൂടെയാണ് വാട്സ് ആപ്പ് ഇക്കാര്യം അറിയിച്ചത്. നിലവില് ആന്ഡ്രോയ്ഡ് ഫോണുകളില് മാത്രമാണ് ഈ സൗകര്യം ലഭ്യമാകുക.
ഐഫോണ് ഉപയോക്താക്കള്ക്ക് എന്ന് ഈ പുതിയ അപ്ഡേഷന് ലഭ്യമാകുമെന്ന കാര്യം ഇതുവരെ അറിയിച്ചിട്ടില്ല. വാട്സ് ആപ്പിന്റെ നൂതന ഫീച്ചറുകളെ ട്രാക്ക് ചെയ്യുന്ന പ്ലാറ്റ്ഫോമായ വാബീറ്റാ ഇന്ഫോ ആണ് ഈ പുതിയ മാറ്റം ആദ്യമായി അവതരിപ്പിച്ചത്. നമ്മുടെ ഫോണിലുള്ള വീഡിയോകള് വാട്സ് ആപ്പ് സ്റ്റാറ്റസ് ആയി ഉപയോഗിക്കുന്നതിനോ മറ്റാര്ക്കെങ്കിലും അയക്കുകയോ ചെയ്യുന്നതിനു മുന്പ് മ്യൂട്ട് ചെയ്യുന്നതിനുള്ള സൗകര്യമാണ് പുതിയ അപ്ഡേഷന് വഴി ഇപ്പോള് ആന്ഡ്രോയ്ഡ് ഫോണുകളില് ലഭ്യമായി തുടങ്ങിയിട്ടുള്ളത്.
ഇതുവഴി വീഡിയോ പങ്കുവെയ്ക്കുന്ന സമയത്ത് തന്നെ തന്നെ വീഡിയോ മ്യൂട്ട് ചെയ്യാന് ഉപഭോക്താവിന് സാധിക്കുന്നു. സാധാരണ വിഡിയോ അയക്കുന്നതിനായി ഉപയോഗിക്കുന്ന വിഡിയോ എഡിറ്റിംഗ് വിന്ഡോയില് വിഡിയോ ട്രിമ്മിംഗ്, ടെക്സ്റ്റ്, സ്റ്റിക്കര് ഓപ്ഷനുകള്ക്കൊപ്പം ഇനി മ്യൂട്ട് ഓപ്ഷനും ലഭ്യമാകും. ഉപഭോക്താക്കള്ക്കായി നൂതനമായ അപ്ഡേഷനുകള് കമ്പനി കൊണ്ടു വരാറുണ്ട്. വാട്സ്ആപ്പിനെ ആശ്രയിക്കുന്നവരാണ് മിക്ക ആളുകളും. സ്വകാര്യ നയത്തെ സംബന്ധിച്ച വാര്ത്തകളെ തുടര്ന്ന് നിരവധി പേര്ക്ക് ഇപ്പോഴും സുരക്ഷയുമായി ബന്ധപ്പെട്ട സംശയങ്ങള് നിലനില്കുന്നുണ്ട്.
