വേനല് കനത്തു തുടങ്ങി. ചൂട് കാറ്റേറ്റ് ആളുകള് കുഴഞ്ഞു വീഴുന്ന അവസ്ഥയാണ്. പീഠഭൂമിയില് നിന്നും വീശുന്ന ഈ തീക്കാറ്റ് മൂലം വയനാട് അതിര്ത്തിയിലെ കടുവാ സങ്കേതങ്ങള് കത്തിയമരുമോ എന്ന ആശങ്കയാണ് ഇപ്പോള് നിലനില്ക്കുന്നത്. നാഗര്ഹൊള, ബന്ദിപൂര് എന്നിങ്ങനെ വയനാടിനോട് അതിര്ത്തി പങ്കിടുന്ന കടുവാ സങ്കേതങ്ങളാണ് ഇപ്പോള് കാട്ടുതീ ഭീതിയിലായിരിക്കുന്നത്. എല്ലാ സമയവും ഇവിടെ കാവലിനായി ആളുകള് ഉണ്ടെങ്കിലും പകല് സമയത്ത് വീശുന്ന തീകാറ്റ് മനുഷ്യനു പോലും സഹിക്കാനാവാത്തതാണ്. കഴിഞ്ഞ ആഴ്ച നാഗര്ഹൊള വനത്തിലെ വെള്ള റേഞ്ചില് തീ പടര്ന്നത് ആശങ്ക വര്ധിപ്പിക്കാന് കാരണമാക്കി.
വനമേഖല ആകെ കരിഞ്ഞുണങ്ങി ഇല്ലാതായി. മണിക്കൂറുകള്ക്ക് ശേഷമാണ് തീയണച്ചത്. അതിര്ത്തിയില് തീ പടര്ന്നു കഴിഞ്ഞാല് വയനാട് വന്യജീവി സങ്കേതത്തിനും കൃഷി മേഖലയ്ക്കും അത് വളരെ ദോഷകരമായി തന്നെ ബാധിക്കും. അതുകൊണ്ടു തന്നെ കേരള വനം വകുപ്പ് കര്ണാടക വനത്തില് നിന്നു തീ പടരാതിരിക്കാന് അതിര്ത്തി പ്രദേശത്ത് വേണ്ട വിധത്തിലുളള മുന്നൊരുക്കങ്ങള് ശക്തമാക്കിയിട്ടുണ്ട്. ഓരോ റേഞ്ചിലും രണ്ടും മൂന്നും അഗ്നിശമന യൂണിറ്റുകള് കാവലുണ്ട്. കൂടാതെ തീ അണയ്ക്കാനായി വനത്തിനുളളില് വെള്ളം എത്തിക്കാനുള്ള സംവിധാനങ്ങളും ചെയ്തിട്ടുണ്ട്.
കൂടാതെ പകല് നിരീക്ഷണത്തിനായി കാവല്ക്കാരേയും ഏര്പ്പെടുത്തിയിട്ടുണ്ട്. അതിനു പുറമേ രാത്രി സമയങ്ങളില് വാഹനങ്ങളിലുളള പെട്രോളിംഗും നടത്തുന്നുണ്ട്. ഉയര്ന്ന ഭാഗങ്ങളില് ടവറുകള് സ്ഥാപിച്ച് നിരീക്ഷണവും നടത്തുന്നുണ്ട്. വയനാട് ജില്ലയുടെ മിക്ക ഭാഗങ്ങളിലും കഴിഞ്ഞാഴ്ച നല്ല മഴ ലഭിച്ചിരുന്നു. എന്നാല് അതൊന്നും പകല് സമയത്ത് ചൂട് കുറച്ചില്ല. മാത്രമല്ല പകല് സമയത്ത് ചൂടേറിയത് ജലാംശത്തെ പെട്ടെന്ന് ഇല്ലാതാക്കാന് കാരണമാകുകയും ചെയ്തു.
Comments