സൂപ്പർഹിറ്റ് ഗാനം നന്ദലാലയ്ക്ക് 22 വർഷങ്ങൾക്ക് ശേഷം വീണ്ടും ചുവടുവച്ച് നടി ഇന്ദ്രജ. നൃത്ത സംവിധായിക സജ്ന നജാമാണ് വീഡിയോ പങ്കുവച്ചത്. സജ്നയും ഇന്ദ്രജയ്ക്കൊപ്പം ചുവടുകൾ വെയ്ക്കുന്നുണ്ട്. 1999ൽ പ്രേക്ഷകരിലേക്കെത്തിയ ‘ഇൻഡിപെൻഡൻസ്’ എന്ന ചിത്രത്തിലേതാണ് ഈ ഗാനം.
സിനിമയിൽ ഇന്ദ്രജയ്ക്ക് പുറമെ വാണി വിശ്വനാഥ്, കലാഭവൻമണി, സുകുമാരി എന്നിവർ തകർത്താടിയ ഗാനരംഗമാണിത്. വിനയൻ സംവിധാനം നിർവഹിച്ച ചിത്രത്തിൽ ഇന്ദ്രജ, വാണി വിശ്വനാഥ്, കലാഭവൻ മണി, സുകുമാരി തുടങ്ങിയവർ പ്രധാന കഥാപാത്രങ്ങളായെത്തി. നിരവധി മികച്ച കഥാപാത്രങ്ങൾ മലയാളികൾക്ക് സമ്മാനിച്ചിട്ടുള്ള ചലച്ചിത്ര താരമാണ് ഇന്ദ്രജ.
ക്രോണിക് ബാച്ച്ലർ, ഉസ്താദ്, എഫ് ഐ ആർ, ശ്രദ്ധ, ബെൻ ജോൺസൺ തുടങ്ങിയ ചിത്രങ്ങളിൽ താരം അഭിനയിച്ചിട്ടുണ്ട്. തമിഴ്സിനിമയിലൂടെ അഭിനയരംഗത്തെത്തിയ ഇന്ദ്രജ ദ ഗോഡ്മാൻ എന്ന ചിത്രത്തിലൂടെയാണ് മലയാളത്തിലെത്തുന്നത്. 12 സി എന്ന ചിത്രത്തിലൂടെ വീണ്ടും മലയാളത്തിൽ തിരിച്ചുവരവിന് ഒരുങ്ങുകയാണ് താരം.
