കൊച്ചി: ബോക്സ് ഓഫീസ് സൂപ്പർ ഹിറ്റ് ചിത്രം ലൂസിഫർ റിലീസ് ചെയ്തിട്ട് ഇന്നേയ്ക്ക് രണ്ട് വർഷം തികയുകയാണ്. ലൂസിഫറിന്റെ വൻ വിജയം റെക്കോഡുകൾ ഭേദിച്ച് മുന്നേറിയപ്പോൾ മോഹൻലാൽ കഥാപാത്രമായ സ്റ്റീഫൻ നെടുമ്പള്ളിയെ മലയാളക്കര ഇരുകയ്യും നീട്ടിയാണ് സ്വീകരിച്ചത്.
ഇപ്പോൾ മുതൽ ലൂസിഫറിന്റെ രണ്ടാം ഭാഗമായ എമ്പുരാനെ കുറിച്ചുള്ള പ്രതീക്ഷയിലാണെന്നും ഇത് ലൂസിഫറിന്റെ രണ്ടാം വർഷമാണെന്നും പൃഥ്വിരാജ് ഇൻസ്റ്റഗ്രാമിൽ കുറിച്ചു. എമ്പുരാൻ ഇറങ്ങാൻ ഒരു വർഷം മാത്രമേ ഉള്ളൂവെന്നും പൃഥ്വിരാജ് അറിയിച്ചു. മോഹൻലാലിനെ നായകനാക്കി പൃഥ്വിരാജ് സംവിധാനം ചെയ്യാനൊരുങ്ങുന്ന രണ്ടാമത്തെ ചിത്രമാണ് എമ്പുരാൻ. സ്റ്റീഫൻ നെടുമ്പള്ളിയെയും അബ്രാം ഖുറേഷിയെയും കുറിച്ച് പ്രേക്ഷകർക്കുള്ള സംശയങ്ങൾക്ക് ഉത്തരം നൽകുന്ന ചിത്രവുമാകും എമ്പുരാൻ.
മലയാളത്തിൽ ആദ്യമായി 200 കോടി ക്ലബിൽ ഇടംപിടിച്ച് ചരിത്രം സൃഷ്ടിച്ച സിനിമയാണ് ലൂസിഫർ. മുരളി ഗോപിയുടെ തിരക്കഥയും പൃഥ്വിരാജിന്റെ സംവിധാനവും മോഹൻലാൽ എന്ന നടന്റെ അഭിനയ മികവുമാണ് ചിത്രം വൻ വിജയമാക്കിയത്. ഏതായാലും എമ്പുരാൻ ഒരു വർഷത്തിനുള്ളിൽ ഉണ്ടാകുമെന്ന് പൃഥ്വിരാജ് അറിയിച്ചതോടെ ആരാധകർ ആവേശത്തിലാണ്.
