കോഴിക്കോട്: ബാലുശേരിയിലെ യുഡിഎഫ് സ്ഥാനാർത്ഥിയും നടനുമായ ധർമജൻ ബോൾഗാട്ടിയെ പോളിംഗ് ബൂത്തിൽ നിന്നും സിപിഎം പ്രവർത്തകർ ഇറക്കിവിട്ടു. ശിവപുരം സ്കൂളിലെ പോളിംഗ് ബൂത്തിലാണ് സംഭവം. ബൂത്തിനകത്ത് ധർമജൻ യുഡിഎഫ് പോളിംഗ് ഏജന്റുമാരെ സന്ദർശിക്കവെ സിപിഎം പ്രവർത്തകർ തടയുകയും ഇറങ്ങിപ്പോകണമെന്ന് ആവശ്യപ്പെടുകയുമായിരുന്നുവെന്ന് ധർമജൻ പറയുന്നു.
തെരഞ്ഞെടുപ്പ് ദിവസം കൂടുതൽ പ്രശ്നം ഉണ്ടാകേണ്ടെന്ന് കരുതിയാണ് താൻ സിപിഎം പ്രവർത്തകരുടെ വാക്ക് കേട്ട് ഇറങ്ങിപ്പോയതെന്ന് ധർമജൻ മാദ്ധ്യമങ്ങളോട് പറഞ്ഞു. പോളിംഗ് ബൂത്തുകളിൽ വോട്ട് അഭ്യർത്ഥിക്കുന്നതിന് മാത്രമാണ് വിലക്കുള്ളതെന്നും സ്ഥാനാർത്ഥികൾക്ക് സന്ദർശന വിലക്കില്ലെന്നും തെരഞ്ഞെടുപ്പ് ഉദ്യോഗസ്ഥർ വിഷയത്തിൽ പ്രതികരിച്ചു.
