പാലക്കാട് : പാലക്കാട് മികച്ച വിജയ പ്രതീക്ഷയിൽ എന്ന് മെട്രോമാൻ ഇ ശ്രീധരൻ. ബിജെപി സംഘപരിവാർ പ്രവർത്തകർ എണ്ണയിട്ട യന്ത്രം പോലെ പ്രവർത്തിച്ചു. തന്റെ വ്യക്തിപ്രഭാവവും ഗുണം ചെയ്യും. വിജയിക്കുകയാണെങ്കിൽ നഗരത്തിൽ എംഎൽഎ ഓഫീസ് ഉൾപ്പെടെ സജ്ജീകരിക്കുന്നതിനെക്കുറിച്ച് ചിന്തിച്ചിട്ടുണ്ട്. പാലക്കാട് നഗരസഭയിലും മറ്റു പഞ്ചായത്തുകളിലും ബിജെപി മുന്നേറ്റം നടത്തും. കേരളത്തിലും ബിജെപി കൂടുതൽ സീറ്റുകൾ നേടും. വിജയിച്ചാൽ രണ്ടുവർഷംകൊണ്ട് പാലക്കാട് കേരളത്തിലെ മികച്ച മണ്ഡലം ആകുമെന്നും ഇ ശ്രീധരൻ പറഞ്ഞു.
നിയമസഭാ തെരഞ്ഞെടുപ്പ് ഫലം വരുമ്പോൾ ബിജെപി കിങ് മേക്കർ ആകും. തൂക്കുസഭ ഉണ്ടാവാനാണ് സാധ്യത. ബിജെപിയുടെ സീറ്റ് രണ്ടക്കം കടക്കും. 35-40 സീറ്റുകൾ വരെ കിട്ടാനുള്ള സാധ്യതയുണ്ട്. താൻ മുഖ്യമന്ത്രി ആകുമോ ഇല്ലയോ എന്ന കാര്യം ബിജെപിയാണ് തീരുമാനിക്കുന്നത്. സംസ്ഥാനത്ത് സർക്കാർ ഉണ്ടാക്കുന്നത് അടക്കമുള്ള കാര്യങ്ങളിൽ കേന്ദ്ര നേതൃത്വം തീരുമാനമെടുക്കുമെന്നും ശ്രീധരൻ പാലക്കാട് പറഞ്ഞു.
