മോഹൻലാൽ ചിത്രം ആറാട്ടിന്റെ ടീസർ നാളെ വിഷു ദിനത്തിൽ പുറത്തിറങ്ങും. മോഹൻലാൽ തന്നെയാണ് ഇക്കാര്യം സോഷ്യൽ മീഡിയയിലൂടെ പങ്കുവച്ചത്. രാവിലെ 11 മണിയ്ക്കാണ് ടീസർ പുറത്തിറങ്ങുന്നത്. ബി. ഉണ്ണികൃഷ്ണനാണ് സിനിമയുടെ സംവിധായകൻ. കാറിൽ നിന്ന് മോഹൻലാൽ ഇറങ്ങി വരുന്ന രംഗത്തിലെ കാലിന്റെ ചിത്രം കാണിച്ചുകൊണ്ടാണ് ടീസർ നാളെ പുറത്തിറങ്ങുമെന്നുള്ള പ്രഖ്യാപനം വന്നിരിക്കുന്നത്.
വില്ലൻ എന്ന സിനിമയ്ക്ക് ശേഷം മോഹൻലാലും ബി ഉണ്ണിക്കൃഷ്ണനും ഒന്നിക്കുന്ന ചിത്രം കൂടിയാണ് ആറാട്ട്. ‘നെയ്യാറ്റിൻകര ഗോപന്റെ ആറാട്ട്’ എന്നാണ് സിനിമയുടെ മുഴുവൻ പേര്. ഒരു പ്രത്യേക ചുമതല നിർവ്വഹിക്കുന്നതിനായി നെയ്യാറ്റിൻകരയിൽ നിന്നും പാലക്കാട്ടെ ഒരു ഗ്രാമത്തിൽ ഗോപൻ എത്തുന്നതും തുടർന്നുള്ള സംഭവങ്ങളുമാണ് ചിത്രത്തിന്റെ പ്രമേയം.
18 കോടി ബഡ്ജറ്റിലാണ് ചിത്രം നിർമ്മിക്കുന്നത്. ശ്രദ്ധ ശ്രീനാഥ് ആണ് ചിത്രത്തിൽ നായിക. നെടുമുടി വേണു, സായി കുമാർ, സിദ്ദിഖ്, വിജയരാഘവൻ, ജോണി ആന്റണി, ഇന്ദ്രൻസ്, രാഘവൻ, ഷീല, സ്വാസിക, തുടങ്ങി നിരവധി താരങ്ങൾ ചിത്രത്തിലുണ്ട്. പാലക്കാടും ഹൈദരാബാദും ആണ് ചിത്രത്തിന്റെ പ്രധാന ലൊക്കേഷനുകൾ. ചിത്രം ഓഗസ്റ്റിൽ പ്രദർശനത്തിന് എത്തിയേക്കുമെന്നാണ് സൂചന.
Aaraattu official teaser releasing on April 14th at 11.00 am IST. Stay tuned
Posted by Mohanlal on Wednesday, April 7, 2021
