വ്യാജവാർത്ത നിർമ്മിക്കുന്നതിൽ വൈദഗ്‌ദ്ധ്യം നേടിയ മാദ്ധ്യമസ്ഥാപനമാണ് ഏഷ്യാനെറ്റ് ന്യൂസെന്ന് എം.വി ജയരാജൻ

‌കണ്ണൂർ : ഏഷ്യാനെറ്റ് ന്യൂസിനെതിരെ രൂക്ഷ വിമർശനവുമായി സിപിഐ‌എം കണ്ണൂർ ജില്ല സെക്രട്ടറി എം.വി ജയരാജൻ. വ്യാജവാർത്ത നിർമ്മിക്കുന്നതിൽ വൈദഗ്‌ദ്ധ്യം നേടിയ മാദ്ധ്യമ സ്ഥാപനമാണ് ഏഷ്യാനെറ്റ് ന്യൂസെന്ന് എം.വി ജയരാജൻ ചൂണ്ടിക്കാട്ടി.ഏഷ്യാനെറ്റിനെറ്റ് ഓഫീസിനു മുൻപിൽ നടത്തിയ പ്രതിഷേധ സത്യാഗ്രഹത്തിലായിരുന്നു ജയരാജന്റെ പരാമർശം.

മൻസൂർ കൊലക്കേസിലെ നാലാം പ്രതി ശ്രീരാഗിനെ മരിച്ച നിലയിൽ കണ്ടെത്തി എന്ന വാർത്ത കൊടുത്തതിനെതിരെയായിരുന്നു പ്രതിഷേധം. വാർത്ത വ്യാജമാണെന്ന് പിന്നീട് ചാനൽ വ്യക്തമാക്കിയെങ്കിലും അതിനു മുൻപ് അത് എത്തേണ്ടിടത്ത് എത്തിയെന്നും ജയരാജൻ ചൂണ്ടിക്കാട്ടി. കാലങ്ങളായി സിപിഎമ്മിനെതിരെ വ്യാജവാർത്തകൾ നിർമ്മിക്കുകയാണ് ഏഷ്യാനെറ്റ് ചെയ്യുന്നത്. ബിജെപി എം.പിയുടെ ഉടമസ്ഥതയിലുള്ള ചാനലായതുകൊണ്ടാണ് ഇത് ചെയ്യുന്നതെന്നും ജയരാജൻ കുറ്റപ്പെടുത്തി.

ഏഷ്യാനെറ്റ് ന്യൂസിന്റെ സിപിഎം വിരുദ്ധത അക്കമിട്ട് നിരത്തിയായിരുന്നു ജയരാജന്റെ പ്രസംഗം. നെയ്യാറ്റിൻകര ഉപതെരഞ്ഞെടുപ്പ് കാലത്ത് വി.എസ് അച്യുതാനന്ദൻ ആർ.എം.പിയിലേക്ക് പോകുമെന്ന് വരെ ഏഷ്യാനെറ്റ് ന്യൂസ് പ്രചരിപ്പിച്ചുവെന്നും ജയരാജൻ ചൂണ്ടിക്കാട്ടി.