ഷൂട്ടിംഗ് ലൊക്കേഷനില്‍ അണിയറ പ്രവര്‍ത്തകര്‍ക്കായി വിഷു കൈനീട്ടം നല്‍കി പ്രിയ താരം സുരേഷ് ഗോപി. സംവിധായകന്‍ ജോഷിയും സുരേഷ് ഗോപിയും ഏഴ് വര്‍ഷങ്ങള്‍ക്ക് ശേഷം വീണ്ടും ഒന്നിക്കുന്ന പാപ്പന്‍ എന്ന സിനിമയുടെ ഷൂട്ടിംഗ് ലൊക്കേഷനില്‍ വെച്ചാണ് താരം കൈനീട്ടം നല്‍കിയത്. തിരഞ്ഞെടുപ്പ് തിരക്കുകള്‍ക്ക് ശേഷം കഴിഞ്ഞ ദിവസമാണ് താരം സെറ്റില്‍ തിരിച്ചെത്തിയത്. വിഷു സമയത്ത് സെറ്റിലെത്തിയ താരം അണിയറ പ്രവര്‍ത്തകര്‍ക്കെല്ലാം കൈനീട്ടം നല്‍കിയാണ് സെറ്റില്‍ വിഷു ആഘോഷമാക്കിയത്. സെറ്റിലെ വിഷുആഘോഷത്തിന്റെ ചിത്രങ്ങള്‍ സോഷ്യല്‍ മീഡിയയില്‍ വളരെ അധികം ശ്രദ്ധ നേടിയിട്ടുണ്ട്. സുരേഷ് ഗോപിയില്‍ നിന്ന് വിഷു കൈനീട്ടം ഏറ്റുവാങ്ങുന്ന ചിത്രങ്ങള്‍ നടിമാരായ കനിഹയും നീത പിള്ളയും സോഷ്യല്‍മീഡിയയില്‍ പങ്കുവെച്ചിട്ടുണ്ട്.
ഏറെ പ്രത്യേകതകയുള്ള കൈനീട്ടം ഏറെ പ്രിയപ്പെട്ട പാപ്പനില്‍ നിന്നും എന്നാണ് ചിത്രം പങ്കുവെച്ച് നീത കുറിച്ചിരിക്കുന്നത്. സുരേഷേട്ടനില്‍ നിന്ന് വിഷു കൈനീട്ടം വാങ്ങി ഈ ദിനം എക്‌സ്ട്ര സ്‌പെഷ്യലായെന്നാണ് ചിത്രം പങ്കുവെച്ച് കനിഹ കുറിച്ചിരിക്കുന്നത്. പാപ്പന്‍ എന്ന കഥാപാത്രത്തിന്റെ വേഷത്തിലാണ് ചിത്രങ്ങളില്‍ സുരേഷ് ഗോപി അണിയറ പ്രവര്‍ത്തകര്‍ക്കെല്ലാം കൈനീട്ടം നല്‍കിയത്. സുരേഷ് ഗോപിയും മകന്‍ ഗോകുല്‍ സുരേഷും ആദ്യമായി ഒന്നിക്കുന്ന സിനിമ കൂടിയാണ് ഇത്. എബ്രഹാം മാത്യു മാത്തന്‍ എന്ന കഥാപാത്രമായാണ് സുരേഷ് ഗോപി സിനിമയില്‍ എത്തുന്നത്.
സണ്ണി വെയ്ന്‍, നൈല ഉഷ, നീത പിള്ള, ആശ ശരത്, കനിഹ, ചന്ദുനാഥ്, വിജയ രാഘവന്‍, ടിനി ടോം, ഷമ്മി തിലകന്‍, തുടങ്ങി നിരവധി താരങ്ങളാണ് ചിത്രത്തില്‍ ഉള്ളത്. ഡേവിഡ് കാച്ചപ്പിള്ളി പ്രൊഡക്ഷന്‍സിന്റെയും ക്യൂബ്‌സ് ഇന്റര്‍നാഷണല്‍ ഗ്രൂപ്പിന്റെയും ബാനറില്‍ ഡേവിഡ് കാച്ചപ്പിള്ളിയും ഷെരീഫ് മുഹമ്മദും ചേര്‍ന്നാണ് ചിത്രം നിര്‍മ്മിക്കുന്നത്. റേഡിയോ ജോക്കിയും കെയര്‍ ഓഫ് സൈറാ ബാനു എന്ന ചിത്രത്തിന്റ തിരക്കഥാകൃത്തുമായ ആര്‍ജെ ഷാനാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. അജയ് ഡേവിഡ് കാച്ചപ്പിള്ളിയാണ് ഛായാഗ്രഹണം.
