ന്യൂഡൽഹി: ലോകമാഹായുദ്ധങ്ങളിൽ ഇന്ത്യൻ സൈനികരെന്നും ധാർമ്മികതയുടെ പ്രതിരൂപമായിരുന്നുവെന്ന് വിദേശകാര്യമന്ത്രി എസ്.ജയശങ്കർ. ആഗോളതലത്തിൽ ലോകമഹായുദ്ധങ്ങളെ സംബന്ധിച്ച് നടന്ന സെമിനാറിലാണ് ജയശങ്കർ ഇന്ത്യൻ സേനാ വിഭാഗം സമാധാനത്തിന്റെ സന്ദേശവാഹകരായിരുന്നുവെന്ന് വ്യക്തമാക്കിയത്.
ഇന്ത്യൻ സൈനികർ ബ്രിട്ടന്റെ അധീനതയിലായിരുന്നപ്പോഴും പിടിച്ചടക്കലിന്റേയോ കടന്നുകയറ്റത്തിന്റേയോ ഒപ്പമായിരുന്നില്ല. അവരെ നയിച്ചത് സൈനിക വിഭാഗത്തിന്റെ മൂല്യങ്ങളും ധാർമ്മികതയുമായിരുന്നുവെന്നും ജയശങ്കർ പറഞ്ഞു.
ഇന്ത്യൻ സൈന്യത്തിന്റെ സ്വഭാവ ശുദ്ധിയും അച്ചടക്കവും ലോകത്തെ നിരവധി സേനാ വിഭാഗങ്ങളെ ഇതുപതാം നൂറ്റാണ്ടിന്റെ ആദ്യഘട്ടം മുതലേ സ്വാധീനിച്ചിരുന്നു. ഇന്ത്യൻ സൈനികർ നാട്ടിലും വിദേശത്തും ഇന്നും അത് കാത്തുസൂക്ഷിക്കുന്നു. സൈനിക ശേഷിയിലും ആധുനീകരണത്തിലും പുതിയ മാറ്റങ്ങൾക്ക് വിധോയരാകുമ്പോഴും ഇന്ത്യ മുന്നിലാണെന്നും ജയശങ്കർ വ്യക്തമാക്കി. ഇന്ന് ലോകമെമ്പാടുമുള്ള ഐക്യരാഷ്ട്രസഭയുടെ സമാധാന സേനാവിഭാഗങ്ങളിലായി അമ്പത് മേഖലയിൽ 2,53,000 ഇന്ത്യൻ സൈനികർ പ്രവർത്തിക്കുന്നുവെന്നും ജയശങ്കർ ചൂണ്ടിക്കാട്ടി.
