തിരുവനന്തപുരം: പുതിയ സർക്കാർ രൂപീകരണത്തിന് മുന്നോടിയായി മുഖ്യമന്ത്രി പിണറായി വിജയൻ നൽകിയ രാജിക്കത്ത് ഗവർണർ ആരിഫ് മുഹമ്മദ് ഖാൻ അംഗീകരിച്ചു. രാജ്ഭവൻ കേന്ദ്രങ്ങളാണ് ഇക്കാര്യം അറിയിച്ചത്. രാവിലെ പത്ത് മണിയോടെ കണ്ണൂരിൽ നിന്ന് തിരിച്ചെത്തിയാണ് മുഖ്യമന്ത്രി ഗവർണറെ കണ്ടത്.
പുതിയ സർക്കാർ രൂപീകരണത്തിനുളള നടപടിക്രമങ്ങൾ പൂർത്തിയാകുന്നത് വരെ കാവൽ മന്ത്രിസഭയായി തുടരാൻ ഗവർണർ അനുമതി നൽകി. മുഖ്യമന്ത്രിയും നിലവിലെ മന്ത്രിസഭാംഗങ്ങളും നടത്തിയ സേവനങ്ങൾക്ക് ഗവർണർ നന്ദി അറിയിച്ചു. തുടർന്നാണ് കാവൽ മന്ത്രിസഭയായി തുടരാൻ നിർദ്ദേശിച്ചത്.
പുതിയ സർക്കാർ രൂപീകരിക്കുന്നതിനുളള നടപടിക്രമങ്ങൾ തെരഞ്ഞെടുപ്പ് കമ്മീഷൻ ചൊവ്വാഴ്ചയോടെ പൂർത്തീകരിക്കുമെന്നാണ് വിവരം. മുഖ്യമന്ത്രിയെ എൽഡിഎഫ് തീരുമാനിച്ച് സർക്കാരുണ്ടാക്കാനുളള അവകാശവാദം ഗവർണറെ അറിയിക്കും. ഇതോടെ അദ്ദേഹം സർക്കാർ രൂപീകരിക്കാൻ മുഖ്യമന്ത്രിയെ ക്ഷണിക്കും.
99 സീറ്റുകൾ നേടിയാണ് എൽഡിഎഫ് കേരളത്തിൽ തുടർഭരണം ഉറപ്പിച്ചത്. പിണറായി വിജയൻ തന്നെയാകും വീണ്ടും മുഖ്യമന്ത്രിയാകുക.
