സ്മാര്ട്ട് ഫോണുകള് വന്നു തുടങ്ങിയതോടു കൂടി ഫോണ് നമ്പര് ഓര്ത്തു വയ്ക്കുന്ന ശീലം എല്ലാവരില് നിന്നും അന്യമായി കൊണ്ടിരിക്കുന്നു. ഇപ്പോള് എല്ലാവരും കോണ്ടാക്റ്റുകള് ഫോണില് സേവ് ചെയ്യുകയാണ് പതിവ്. അതുകൊണ്ടുതന്നെ ഫോണ് നഷ്ടപ്പെട്ടു പോവുകയോ പുതിയ ഫോണ് വാങ്ങുകയോ ചെയ്യുകയാണെങ്കില് ആ ഫോണില് സേവ് ചെയ്തിട്ടുളള കോണ്ടാക്റ്റുകള് എല്ലാം തന്നെ നഷ്ടപ്പെടാം. എന്നാല് ഇനി അതോര്ത്ത് ആശങ്കപ്പെടേണ്ടതില്ല. ഗൂഗിളുമായി ഫോണിലെ നമ്പറുകള് ബന്ധിപ്പിച്ചാല് മതി. ഫോണ് നഷ്ടപ്പെട്ടാലോ, പുതിയ ഫോണ് എടുക്കേണ്ടി വന്നാലോ ഫോണില് ഉണ്ടായിരുന്ന മുഴുവന് നമ്പറുകളും ഗൂഗിള് വഴി തിരിച്ചെടുക്കാന് സാധിക്കും. ഗൂഗിളില് അക്കൗണ്ടുളള എല്ലാവര്ക്കും ഈ സംവിധാനം ഉപയോഗിക്കാന് കഴിയും.
ആന്ഡ്രോയിഡ് മൊബൈലുകള് ഉപയോഗിക്കുന്നവര്ക്ക് എല്ലാവര്ക്കും തന്നെ ഗൂഗിള് അക്കൗണ്ട് ഉണ്ടായിരിക്കും. കാരണം ഗൂഗിള് അക്കൗണ്ട് വഴിയാണ് ആപ്പുകള് പ്ലേസ്റ്റോറില് നിന്നും ഇന്സ്റ്റാള് ചെയ്യുന്നത്. ഫോണിലെ നമ്പറുകള് ഗൂഗിളുമായി ബന്ധിപ്പിക്കുന്നതിനായി താഴെ പറയുന്ന രീതിയില് മുന്നോട്ട് പോകുക. നിങ്ങളുടെ ആന്ഡ്രോയിഡ് ഫോണ് അല്ലെങ്കില് ടാബിലെ ‘സെറ്റിങ്സ്’ തുറക്കുക. അതിലെ ‘ഗൂഗിള്’ എന്നതില് നിന്ന് ‘അക്കൗണ്ട് സര്വീസസ്’ തിരഞ്ഞെടുക്കുക. അതില് നിന്ന് ‘കോണ്ടാക്ട് സിങ്ക്’ തിരഞ്ഞെടുത്ത ശേഷം ഓട്ടോമാറ്റിക്കലി സിങ്ക് ഗൂഗിള് കോണ്ടാക്ട് എന്നത് ക്ലിക്ക് ചെയ്യുക.
ആ ഓപ്ഷന് സിങ്ക് ചെയ്യുന്നതിനായി ഓണ് ചെയ്യുക. സിങ്ക് ചെയ്യുന്നത് ഓഫ് ചെയ്യുന്നതിനും ഇത് തന്നെയാണ് ഉപയോഗിക്കേണ്ടത്. ചില ഫോണുകളില് സെറ്റിങ്സില് നിന്ന് അക്കൗണ്ട്സ് എന്ന ഓപ്ഷന് നേരിട്ട് എടുക്കാന് സാധിക്കും അങ്ങനെയുള്ള ഫോണുകളില് ആ ഓപ്ഷന് തിരഞ്ഞെടുത്ത് അതില് നിന്ന് ഗൂഗിള് തിരഞ്ഞെടുത്ത് അക്കൗണ്ടില് ക്ലിക്ക് ചെയ്ത് സിങ്ക് ചെയ്യുന്നതിനുള്ള ഓപ്ഷന് തിരഞ്ഞെടുത്താല് മതി. ഇനി നിങ്ങളുടെ ഫോണില് ഇത് കാണുന്നില്ലെങ്കില് സെറ്റിങ്സില് കയറിയ ശേഷം മുകളിലെ സെര്ച്ച് ബാറില് ”അക്കൗണ്ട്സ്” എന്ന് സെര്ച്ച് ചെയ്താല് മതി. ഇങ്ങനെ ഫോണിലെ നമ്പറുകള് ഗൂഗിളുമായി ബന്ധിപ്പിക്കുന്നതിലൂടെ മൊബൈല് നഷ്ടമായാല് നമ്പറുകളും നഷ്ടമാകുമല്ലോ എന്ന ആശങ്ക ഒഴിവാക്കാം.
Comments