സിനിമ എന്നത് പലരുടേയും സ്വപ്‌നമാണ്. ഒരു നടനാകുക അല്ലെങ്കില്‍ നല്ല സംവിധായകനാകുക എന്ന ആഗ്രഹമാണ് മിക്ക ചെറുപ്പക്കാരേയും സിനിമയുടെ ലോകത്ത് എത്തിക്കുന്നത്. എന്നാല്‍ വളരെ അപ്രതീക്ഷിതമായി സിനിമയില്‍ എത്തിച്ചേരുന്നവരും ഉണ്ട്. പിന്നീട് അത്തരം ചെറിയ വേഷങ്ങളിലൂടെ ജനശ്രദ്ധ നേടി പിന്നീട് നടന്മാരായി മാറും. എന്നാല്‍ ഇവിടെ ഈ കലാകാരന്‍ മാറിയത് നടനായല്ല സംവിധായകനായിട്ടാണ്. സംവിധായകന്‍ മാര്ട്ടിന് പ്രക്കാട്ടിനുമുണ്ട് അത്തരമൊരു സിനിമാ അനുഭവം.
അച്ചുവിന്റെ അമ്മ എന്ന സിനിമയുടെ ലൊക്കേഷനില്‍ ഒരു അഭിമുഖത്തിനായി ചിത്രങ്ങള്‍ എടുക്കാന്‍ ചെന്നതായിരുന്നു മാര്ട്ടിന്. അങ്ങനെയാണ് ആ ചിത്രത്തില്‍ ഒരു ചെറിയ സീനില്‍ മാര്ട്ടിന് പ്രത്യക്ഷപ്പെടുന്നത്. ഒരു ടെക്സ്റ്റയില്‍ തൊഴിലാളിയുടെ വേഷമായിരുന്നു മാര്ട്ടിന് ലഭിച്ചത്. എന്നാല്‍ അഭിനയം മാര്ട്ടിന് ഇതാദ്യമല്ല. കോളജ് കാലഘട്ടത്തില്‍ യൂണിവേഴ്സിറ്റി തലത്തില്‍ ബെസ്റ്റ് ആക്ടര്‍ ആയ ആളാണ് മാര്ട്ടിന്.
എന്നാല്‍ കാമറയ്‌ക്കു മുമ്പില്‍ നില്‍ക്കുന്നതിനേക്കാള്‍ കാമറയ്‌ക്കു പിന്നില്‍ നില്‍ക്കുവാനുള്ള ഇഷ്ടം മനസ്സില്‍ കയറിക്കൂടിയതോടെ സംവിധായകനിലേക്കു മാറുകയായിരുന്നു. മമ്മൂട്ടിയെ നായകനാക്കിയുള്ള ബെസ്റ്റ് ആക്ടര്‍ ആയിരുന്നു സംവിധായകന്‍ എന്ന നിലയില്‍ മാര്‍ട്ടിന്റെ ആദ്യ ചിത്രം. തുടര്‍ന്ന് എബിസിഡി, ചാര്‍ലി എന്നീ സിനിമകളും വന്‍വിജയങ്ങളായി. മാര്‍ട്ടിന്റെ ഏറ്റവും പുതിയ ചിത്രമാണ് നായാട്ട്. ഓടിടി പ്ലാറ്റ്ഫോമില്‍ ഇപ്പോള്‍ പ്രദര്‍ശനം തുടര്‍ന്നു കൊണ്ടിരിക്കുന്ന ചിത്രത്തിന് മികച്ച പ്രതികരണമാണ് ലഭിക്കുന്നത്.
