മലയാളത്തിലെ ഹിറ്റ് ചിത്രങ്ങളുടെ പട്ടികയില്‍ സ്ഥാനം നേടിയ ചിത്രമാണ് ഐവി ശശി സംവിധാനം ചെയ്ത ദേവാസുരം. മോഹന്‍ലാലിന്റെ കഥാപാത്രങ്ങളില്‍ പ്രേക്ഷക ശ്രദ്ധ നേടിയ ഒന്നാണ് മംഗലശ്ശേരി നീലകണ്ഠന്‍. ഭാനുമതി, മുണ്ടയ്‌ക്കല്‍ ശേഖരന്‍ തുടങ്ങി ചിത്രത്തിലെ ഓരോ കഥാപാത്രങ്ങളും ഇപ്പോഴും മലയാളി മനസ്സില്‍ തിളങ്ങി നില്‍ക്കുന്നു. മംഗലശ്ശേരി നീലകണ്ഠനും ഭാനുമതിയുമെല്ലാം ജീവിച്ചിരിക്കുന്ന കഥാപാത്രങ്ങളാണ് എന്നത് അറിയാത്ത ചിലരെങ്കിലും ഉണ്ടായിരിക്കും. എന്നാല്‍ ഇപ്പോള്‍ സോഷ്യല്‍ മീഡിയയില്‍ വൈറലായി കൊണ്ടിരിക്കുന്നത് ജീവിതത്തിലെ മംഗലശ്ശേരി നീലകണ്ഠനും ഭാനുമതിക്കുമൊപ്പമുളള രേവതിയുടെ ചിത്രമാണ്.
ദേവാസുരത്തില്‍ ഭാനുമതിയായി എത്തിയത് രേവതിയായിരുന്നു. മുല്ലശ്ശേരി രാജഗോപാലാണ് മംഗലശ്ശേരി നീലകണ്ഠന്‍ എന്ന കഥാപാത്രമായി മാറിയത് . ഭാനുമതിയായത് അദ്ദേഹത്തിന്റെ പ്രിയപത്‌നി ലക്ഷ്മിയും. മുല്ലശ്ശേരി രാജഗോപാലിന്റെ പേരക്കുട്ടിയും അഭിനേത്രിയുമായ നിരഞ്ജന അനൂപാണ് ചിത്രം പങ്കുവെച്ചിരിക്കുന്നത്. വലിയ സ്വീകാര്യതയാണ് ഈ ചിത്രത്തിനു ലഭിച്ചു കൊണ്ടിരിക്കുന്നത്. രാജഗോപാൽ ഓര്‍മ്മയായി എങ്കിലും അദ്ദേഹത്തിന്റെ പത്‌നി ലക്ഷ്മി ഇപ്പോഴമുണ്ട്.
മുല്ലശ്ശേരി രാജഗോപാലിൽ നിന്നും അറിഞ്ഞ വിവരങ്ങളും നാട്ടില്‍ നിന്നും അറിഞ്ഞ വിവരങ്ങളും ചേര്‍ത്തു വച്ചാണ് മംഗലശ്ശേരി നീലകണ്ഠൻ എന്ന കഥാപാത്രത്തിന് ദേവാസുരത്തിന്റെ തിരക്കഥാകൃത്തായ രഞ്ജിത്ത് ജീവന്‍ നല്‍കിയത്. ചിത്രം ഇറങ്ങി വര്‍ഷങ്ങള്‍ പിന്നിട്ടിട്ടും ഇപ്പോഴും ആ കഥാപാത്രങ്ങള്‍ മലയാളി മനസ്സില്‍ നിന്നും മായാതെ നില്‍ക്കുന്നു. ദേവാസുരത്തിന്റെ രണ്ടാം ഭാഗമായ രാവണപ്രഭുവും മലയാളികള്‍ ഇരു കൈയ്യും നീട്ടി തന്നെ സ്വീകരിച്ചു.
