മലയാള സിനിമയില് നാലുപതിറ്റാണ്ടോളം നിറഞ്ഞുനിന്ന അതുല്യ പ്രതിഭയാണ് ഒടുവില് ഉണ്ണികൃഷ്ണന്. കഥാപാത്രങ്ങള്ക്ക് നാട്ടിന്പുറത്തിന്റേയും നിഷ്കളങ്കതയുടെയും ഭാവങ്ങള് പകര്ന്നുനല്കിയ പ്രിയ കലാകാരന് ഒടുവില് ഉണ്ണികൃഷ്ണന് ഓര്മയായിട്ട് ഇന്നേക്ക് പതിനഞ്ച് വര്ഷം കഴിഞ്ഞിരിക്കുന്നു. തൃശ്ശൂര് ജില്ലയില് വടക്കാഞ്ചേരി എങ്കക്കാട്ട് ഒടുവില് വീട്ടില് കൃഷ്ണമേനോന്റെയും പാറുക്കുട്ടിയമ്മയുടെയും മകനായി 1943 ഫെബ്രുവരി 13-നാണ് ജനനം. ചെറുപ്പം മുതലേ സംഗീതത്തില് തല്പരനായിരുന്ന ഉണ്ണികൃഷ്ണന് സ്കൂള് വിദ്യാഭ്യാസത്തിനു ശേഷം തബല, മൃദംഗം തുടങ്ങിയ സംഗീത ഉപകരണങ്ങള് വായിക്കുവാന് പഠിക്കുകയും തുടര്ന്ന് കലാമണ്ഡലം വാസുദേവ പണിക്കരുടെ കീഴില് സംഗീതം അഭ്യസിക്കുകയും ചെയ്തു.
കെ.പി.എ.സി.യുടെയും കലാനിലയത്തിന്റെയും കേരള കലാവേദിയുടെയും നാടകങ്ങളില് അഭിനയിച്ചു. പിന്നീട് 1970-ല് പി.എന്. മേനോന്റെ ദര്ശനം എന്ന സിനിമയിലൂടെ മലയാള സിനിമയില് അരങ്ങേറ്റം കുറിച്ചു. നാനൂറോളം ചിത്രങ്ങളില് അഭിനയിച്ചു. സത്യന് അന്തിക്കാട് ചിത്രങ്ങളിലെ നിറ സാന്നിധ്യമായിരുന്നു ഒടുവില്. 1993-ല് പുറത്തിറങ്ങിയ ദേവാസുരം എന്ന ഐ.വി. ശശി ചിത്രത്തിലെ, പരിവ്രാജകനായ പെരിങ്ങോടന്,
ആറാം തമ്പുരാന് എന്ന ചിത്രത്തില് പ്രാണനെപ്പോലെ സ്നേഹിച്ച ഹാര്മോണിയം വില്ക്കേണ്ടിവന്ന കോവിലകത്തെ തമ്പുരാന് തുടങ്ങി മലയാളികളുടെ മനസ്സില് നിറഞ്ഞു നില്ക്കുന്ന നിരവധി രംഗങ്ങളുടെ ഭാഗമാകാന് ഒടുവിനു സാധിച്ചു. 2006-ല് സത്യന് അന്തിക്കാട് സംവിധാനം ചെയ്ത രസതന്ത്രം എന്ന ചിത്രത്തിലാണ് ഒടുവില് ഉണ്ണികൃഷ്ണന് അവസാനമായി അഭിനയിച്ചത്. വൃക്ക സംബന്ധമായ രോഗത്തെ തുടര്ന്ന് 2006 മേയ് 27-ന് അദ്ദേഹം ഈ ലോകത്തോട് വിട പറഞ്ഞു.
Comments