ചെന്നൈ: തിരക്കുകൾക്കിടിയിലും ഫിറ്റ്‌നസിന്റെ കാര്യത്തിൽ അതീവ ശ്രദ്ധപുലർത്താറുള്ള താരമാണ് മോഹൻലാൽ. സിനിമകൾക്കായി അദ്ദേഹം വരുത്താറുള്ള ഫിറ്റ്‌നസ് മാറ്റങ്ങൾ ശ്രദ്ധനേടാറുമുണ്ട്. തന്റെ വർക്കൗട്ട് വീഡിയോകളെല്ലാം അദ്ദേഹം സോഷ്യൽ മീഡിയയിലൂടെ ഇടയ്‌ക്ക് പങ്കുവെയ്‌ക്കാറുണ്ട്. അത്തരത്തിലൊരു വർക്കൗട്ട് വീഡിയോയാണ് ഇപ്പോൾ ആരാധകർക്കിടയിൽ ശ്രദ്ധനേടുന്നത്. ലോക്ഡൗൺ കാലത്ത് ചെന്നൈയിലെ വീട്ടിലാണ് മോഹൻലാലുള്ളത്.
ചെന്നൈയിലെ വീട്ടിലെ ബാൽക്കണിയിൽ നിന്ന് വ്യായാമം ചെയ്യുന്ന വീഡിയോയാണ് സുഹൃത്ത് സമീർ ഹംസ പങ്കുവെച്ചിരിക്കുന്നത്. സ്‌കിപ്പിങ്‌റോപ്പ്, പഞ്ചിങ് ബാഗ് എന്നിവ ഉപയോഗിച്ചാണ് മോഹൻലാൽ വ്യായാമം ചെയ്യുന്നത്. കടലിന് അടുത്തായിട്ടാണ് ലാലേട്ടന്റെ ചെന്നൈയിലെ വീട്. താടി നീട്ടി വളർത്തിയ ലുക്കിലാണ് പുതിയ വീഡിയോയിൽ മോഹൻലാലിനെ കാണാനാകുക.
മോഹൻലാൽ ബോക്‌സിങ് പ്രമേയമായ ചിത്രത്തിൽ നായകനാകുമെന്ന വാർത്ത വന്നതോടെ കൂടി താരത്തിന്റെ വ്യത്യസ്ത ഫിറ്റ്‌നസ് വർക്കൗട്ട് വീഡിയോകൾ സോഷ്യൽ മീഡിയയിൽ തരംഗം ആവാറുണ്ട്. അതിൽ ഏറ്റവും ഒടുവിലത്തേതാണ് ഇത്. ബോക്‌സിങ് ചിത്രം സംവിധാനം ചെയ്യുന്നത് പ്രിയദർശനാണ്. സിനിമയെ കുറിച്ച് കൂടുതൽ വിവരങ്ങൾ പുറത്തുവിട്ടിട്ടില്ല.
അതേസമയം ആദ്യ സംവിധാന സംരംഭമായ ബറോസാണ് ഇപ്പോൾ താരത്തിന്റേതായി പുരോഗമിക്കുന്ന സിനിമ. ഗോവയിൽ ആദ്യ ഷെഡ്യൂൾ പൂർത്തിയായതായി നേരത്തെ റിപ്പോർട്ടുകൾ ഉണ്ടായിരുന്നു. വിദേശ താരങ്ങളും മലയാളത്തിന്റെ ശ്രദ്ധേയമായ താരങ്ങളും സിനിമയിൽ അഭിനയിക്കുന്നുണ്ട്. ബറോസിന് പുറമെ മരക്കാർ അറബിക്കടലിന്റെ സിംഹം, ആറാട്ട്, എമ്പുരാൻ തുടങ്ങിയ ചിത്രങ്ങളാണ് പുറത്തുവരാനുള്ളത്.
https://www.instagram.com/p/CPYQwv6pM3P/?utm_source=ig_web_copy_link
