വാഹന പ്രേമികൾ ഏറെ പ്രതീക്ഷയോടെ കാത്തിരിക്കുന്ന അൽകാസറിനെ രാജകീയമായി സ്വാഗതം ചെയ്ത് ഹ്യൂണ്ടായി എസ് യുവികൾ. ട്യൂസോൺ, കോന, ക്രേറ്റ, വെന്യു എന്നീ എസ്യുവികൾ ഉപയോഗിച്ച് റാൻ ഓഫ് കച്ച് മരുഭൂമിയിൽ അൽകാസർ എന്നെഴുതിയാണ് പുതിയ എസ്യുവിയെ വരവേറ്റത്. ഇന്ത്യയിലെ ഹ്യൂണ്ടായിയിൽ നിന്നുള്ള ഏറ്റവും പുതിയ എസ്യുവിയാണ് അൽകാസർ. മൂന്ന് നിര സീറ്റുകളുമായി വരുന്ന ആദ്യത്തെ മോഡൽ കൂടിയാണിത്.
കിയ സെല്റ്റോസിനും ഹ്യുണ്ടായി ക്രെറ്റയ്ക്കും അടിസ്ഥാനമൊരുക്കുന്ന കെ2 പ്ലാറ്റ്ഫോമിന്റെ പുതുക്കിയ പതിപ്പിലാണ് അല്കാസര് നിർമ്മിച്ചിരിക്കുന്നത്. ക്രെറ്റയെക്കാള് 20 എം.എം. വീല്ബേസും 30 എം.എം. നീളവും കൂട്ടായാണ് അല്കാസര് ഒരുക്കിയിരിക്കുന്നത്. മുൻഭാഗത്തെ ഡിസൈൻ ക്രെറ്റയ്ക്ക് സമാനമാണെങ്കിലും പിൻഭാഗത്തെ ഡിസൈനിൽ വലിയ മാറ്റം തന്നെ വരുത്തിയിട്ടുണ്ട്.
6, 7 സീറ്റർ കോൺഫിഗറേഷനിൽ പുതിയ ഹ്യുണ്ടായി അൽകാസർ വരും. 6 സീറ്റർ മോഡലിന് രണ്ടാം നിരയിലേക്ക് ക്യാപ്റ്റൻ സീറ്റുകളും 7 സീറ്ററിൽ 60:40 സ്പ്ലിറ്റ് ഫംഗ്ഷനോടുകൂടിയ ബെഞ്ച് തരത്തിലുള്ള രണ്ടാം നിര സീറ്റുകളും ലഭിക്കും. രണ്ട് എഞ്ചിൻ ഓപ്ഷനുകളിലായി 1.4 ലിറ്റർ ടർബോചാർജ്ഡ് പെട്രോൾ, ആറ് സ്പീഡ് ടോർക് കൺവെർട്ടറുള്ള 1.5 ലിറ്റർ ടർബോ ഡീസൽ എന്നിങ്ങനെ അൽകാസാർ വിപണിയിലേക്ക് എത്താനാണ് സാധ്യത.
ടാറ്റയുടെ പുതിയ സഫാരി, മഹീന്ദ്രയുടെ എക്സ് യുവി500, എംജിയുടെ ഹെക്ടർ പ്ലസ് തുടങ്ങിയവർക്ക് എതിരാളിയായാണ് അൽകാസർ എത്തുന്നത്. എന്നാൽ പ്രധാന വെല്ലുവിളിയാകുന്നത് ടൊയോട്ടയുടെ ജനപ്രിയ വാഹനമായ ഇന്നോവയ്ക്ക് ആയിരിക്കുമെന്നും റിപ്പോർട്ടുകളുണ്ട്.13 ലക്ഷം മുതൽ 19 ലക്ഷം രൂപ വരെയാണ് പുതിയ മോഡലിന് പ്രതീക്ഷിക്കുന്ന വില.
