ക്ലാസുകള് എല്ലാം ഓണ്ലൈനായതോടെ സ്മാര്ട്ട്ഫോണുകളില്ലാത്തവരും മതിയായ ഇന്റര്നെറ്റില്ലാത്തതുമൊക്കെയായി ബുദ്ധിമുട്ടനുഭവിക്കുന്ന നിരവധി ആളുകള് ഉണ്ട്. അത്തരത്തിലുളള കുട്ടികളുടെ നിരവധി വാര്ത്തകള് സോഷ്യല് മീഡിയയില് വൈറലാകാറുണ്ട്. എന്നാല് ഇന്റര്നെറ്റില്ലാതെ ക്ലാസ് എടുക്കാന് കഴിയാതെ വന്ന ഒരു അധ്യാപകന് കണ്ടെത്തിയ പുതിയ പരിഹാര മാര്ഗമാണ് ഇപ്പോള് ശ്രദ്ധിക്കപ്പെട്ടിരിക്കുന്നത്. ബംഗളൂരുവില് നിന്ന് 250 കിലോമീറ്റര് അകലെയുള്ള കൊടകിലെ സോംവര്പേട്ട മുള്ളൂര് ഗ്രാമത്തില് നിന്നുള്ള സി.എസ്. സതീഷ, എന്ന അധ്യാപകനാണ് മികച്ച ഇന്റര്നെറ്റ് ലഭിക്കാനായി മരത്തിന് മുകളില് ഏറുമാടം കെട്ടി ക്ലാസ്റൂം തയ്യാറാക്കിയിരിക്കുന്നത്.
മുപ്പത്തിയേഴുകാരനായ സര്ക്കാര് സ്കൂള് അധ്യാപകന് രണ്ടു മാസമെടുത്താണ് മരത്തിന് മുകളില് മുള കൊണ്ടുളള ഏറുമാടം നിര്മ്മിച്ചിരിക്കുന്നത്. മല്ലൂരിലെ ഗവണ്മെന്റ് ലോവര് പ്രൈമറി സ്കൂളില് ഒന്ന് മുതല് അഞ്ചാം ക്ലാസ് വരെയുള്ള വിദ്യാര്ത്ഥികളെയാണ് സതീഷ പഠിപ്പിക്കുന്നത്. മരത്തിന് മുകളിലെ ക്ലാസ്റൂമില് നിന്നാണ് സതീഷയുടെ ഇപ്പോഴത്തെ ക്ലാസ്. ഉയര്ന്ന സ്ഥലത്ത് നിന്ന് ക്ലാസുകളെടുക്കുന്നതു കൊണ്ട് ഇന്റര്നെറ്റ് ഒരു പ്രശ്നമാകില്ലെന്ന് സതീഷ പറഞ്ഞു.
ഇംഗ്ലീഷ്, കണക്ക്, കന്നഡ എന്നിവയാണ് വിഷയങ്ങള്. ലൈറ്റിംഗ് ഉള്പ്പെടെ ഏറുമാടം നിര്മ്മിക്കാന് 10,000 രൂപ ചെലവായി. വിളകള് നശിപ്പിക്കുന്ന ആനകളെയും കാട്ടുപന്നികളെയും നിരീക്ഷിക്കാന് ഗ്രാമീണര് വിളവെടുപ്പ് സീസണില് ഉപയോഗിക്കുന്ന താല്ക്കാലിക ഏറുമാടങ്ങളില് നിന്ന് പ്രചോദനം ഉള്ക്കൊണ്ടാണ് ഓണ്ലൈന് ക്ലാസിനായി ഇങ്ങനെയൊരു ക്ലാസ്റൂം നിര്മ്മിക്കാന് തീരുമാനിച്ചതെന്ന് സതീഷ പറഞ്ഞു.
Comments