സോഷ്യല്‍ മീഡിയയില്‍ നിറഞ്ഞാടുന്നത് ഇന്ന് രാവിലെ നടന്ന കോപ്പ അമേരിക്ക ചാമ്പ്യന്‍ഷിപ്പ് ഫൈനല്‍ മത്സരത്തില്‍ വിജയിച്ച അര്‍ജന്റീനയുടെ ആഘോഷ പ്രകടനമാണ്. എന്നാല്‍ ഏറ്റവും കൂടുതല്‍ ആളുകള്‍ വാട്‌സാപ്പ് സ്റ്റാറ്റസുകള്‍ ആക്കിയത് പങ്കുവെക്കുകയും ചെയ്ത ഒരു വീഡിയോ ഉണ്ടായിരുന്നു, കളിയില്‍ തോറ്റ ബ്രസീല്‍ ഫാനായ അച്ഛന്റെ മുന്നില്‍ ആഹ്ലാദ പ്രകടനം നടത്തുന്ന മകന്റെ വീഡിയോ… അച്ഛനും മകനും എന്നു പറഞ്ഞ് നിരധി പേരാണ് ഈ വീഡിയോ സമൂഹ മാധ്യമങ്ങള്‍ വഴി പങ്കുവെച്ചത്.
എന്നാല്‍ ഇവര്‍ അച്ഛനും മകനുമല്ല എന്നതാണ് യാഥാര്‍ഥ്യം. ബഹ്‌റൈനിലെ അല്‍ റബീഹ് ദന്തല്‍ ക്ലിനിക്കിലെ ജീവനക്കാരാണ് ഇരുവരും. ഇസാടൗണിലെ റൂമിലിരുന്ന് കളി കാണുന്നതിനിടയിലുളള ഇരുവരുടേയും ദൃശ്യങ്ങളാണ് ഇന്ന് സമൂഹ മാധ്യമങ്ങളിലൂടെ വൈറലായിരിക്കുന്നത്.
ബ്രസീല്‍ ആരാധകനായ ലത്തീഫും അര്‍ജന്റീന ആരാധകനായ അര്‍ഷാദുമാണ് വീഡിയോയില്‍ ഉളളത്. അര്‍ജന്റീന ജയിച്ചപ്പോഴുളള സഹപ്രവര്‍ത്തകന്റെ മുന്നില്‍ നടത്തിയ ആഹ്ലാദ പ്രകടനമായിരുന്നു വൈറലായ വീഡിയോ.. എന്നാല്‍ അച്ഛനു മുന്നില്‍ ആഹ്ലാദ പ്രകടനം നടത്തുന്ന മകന്‍ എന്ന രീതിയിലാണ് ദൃശ്യം പ്രചരിച്ചിരുന്നത്. കൊണ്ടോട്ടി സ്വദേശികളാണ് ഇരുവരും.
