ചെന്നൈ: പ്രശസ്ത ചലച്ചിത്ര പിന്നണി ഗായിക കല്ല്യാണി മേനോന് അന്തരിച്ചു. 80 വയസായിരുന്നു. ചെന്നൈയിലായിരുന്നു അന്ത്യം. പക്ഷാഘാതത്തെ തുടര്ന്ന് കുറച്ചു നാളുകളായി ചെന്നൈയിലെ സ്വകാര്യ ആശുപത്രിയില് ചികിത്സയിലായിരുന്നു. തമിഴിലും മലയാളത്തിലുമായി നൂറിലേറെ പാട്ടുകള് പാടിയിട്ടുണ്ട്. കൊച്ചി കാരയ്ക്കാട്ട് കുടുംബാംഗവും സംവിധായകന് രാജീവ് മേനോന്റെ അമ്മയുമാണ്.
1973ൽ തോപ്പിൽ ഭാസി സംവിധാനം ചെയ്ത ‘അബല’യാണ് ആദ്യമായി പാടിയ ചിത്രം. പവനരച്ചെഴുതുന്നു, ഋതുഭേദകല്പന, ജലശയ്യയില് തളിരമ്പിളി, എന്നിവയാണ് പ്രശസ്ത മലയാള ഗാനങ്ങള്. അലൈപായുതേ,മുത്തു, കാതലന് തുടങ്ങിയ സിനിമകളില് എ.ആര്. റഹ്മാന് ചിട്ടപ്പെടുത്തിയ പാട്ടുകള് പാടിയതോടെ തമിഴകത്ത് സൂപ്പര് ഹിറ്റായി .2018 ല് പുറത്തിറങ്ങിയ വിജയ് സേതുപതി സിനിമ 96 ലെ കാതലേ… കാതലേയെന്ന പാട്ടാണ് ഒടുവില് സിനിമയ്ക്കായി പാടിയത്.
