ഇന്ദ്രന്സ് കേന്ദ്ര കഥാപാത്രമായി എത്തുന്ന പുതിയ ചിത്രമാണ് ഹോം. ആഗസ്റ്റ് 19 ന് ഒടിടി പ്ലാറ്റ്ഫോമായ ആമസോണ് പ്രൈമിലൂടെയാണ് ചിത്രത്തിന്റെ റിലീസ്. റോജിന് തോമസ് ആണ് ചിത്രത്തിന്റെ സംവിധാനം നിര്വഹിക്കുന്നത്. വിജയ് ബാബു ആണ് ചിത്രത്തിന്റെ നിര്മാണം. ചിത്രത്തിന്റേതായി നേരത്തെ പുറത്തിറങ്ങിയ ടീസറും ശ്രദ്ധ നേടിയിരുന്നു.
രാഹുല് സുബ്രഹ്മണ്യമാണ് ചിത്രത്തിന്റെ സംഗീത സംവിധാനം നിര്വഹിച്ചിരിക്കുന്നത്. നീല് ആണ് ഛായാഗ്രഹണം. ശ്രീനാഥ് ഭാസി, നസ്ലിന്, ജോണി ആന്റണി, മഞ്ജു പിള്ള, മണിയന്പിള്ള രാജു, അനൂപ് മേനോന്, ശ്രീകാന്ത് മുരളി, കെപിഎസി ലളിത, ദീപ തോമസ്, വിജയ് ബാബു തുടങ്ങി നിരവധി താരങ്ങളും അണിനിരക്കുന്നുണ്ട് ചിത്രത്തില്.
ഇന്ദ്രന്സിന്റെ കരിയറിലെ തന്നെ മികച്ച ചിത്രങ്ങളിലൊന്നായിരിക്കും ഈ സിനിമയെന്നാണ് അണിയറ പ്രവര്ത്തകരുടെ പ്രഖ്യാപനം. 1981-ല് മലയാള സിനിമയില് തുടക്കം കുറിച്ച ഇന്ദ്രന്സ് അഭിനയ മികവ് കൊണ്ട് പ്രേക്ഷകരെ വിസ്മയിപ്പിക്കുന്ന പ്രതിഭയാണ് . ഹാസ്യ കഥാപാത്രങ്ങളിലൂടെയാണ് താരം പ്രേക്ഷകര്ക്ക് സുപരിചിതനായതെങ്കിലും ഇന്ദ്രന്സ് എന്ന കലാകാരന് വെള്ളിത്തിരയില് എക്കാലവും ഒരുക്കുന്നത് അവിസ്മരണീയ കഥാപാത്രങ്ങളെ തന്നെയാണ്.
