ഇലക്ട്രിക് ഇരുചക്ര വാഹന വിപണിയിൽ വിപ്ലവം സൃഷ്ടിച്ച്, ഒലയുടെ ഇലക്ട്രിക് ഇരുചക്ര വാഹന ശ്രേണിയിലെ ആദ്യ പതിപ്പായ ഒല എസ്1 കഴിഞ്ഞ ദിവസമാണ് അവതരിപ്പിച്ചത്. എസ്1, എസ്1 പ്രോ എന്നിങ്ങനെ രണ്ടു വകഭേദങ്ങളിൽ എത്തുന്ന സ്കൂട്ടർ മാറ്റ്, മെറ്റാലിക് ഫിനിഷിങ്ങിൽ, അതിശയകരമായ പത്ത് നിറങ്ങളിലാണ് ഉപഭോക്താക്കളിലേക്കെത്തുക. സംസ്ഥാന സർക്കാർ സബ്സിഡികളും, രജിസ്ട്രേഷനും ഇൻഷുറൻസും അടക്കം 99,999 രൂപയാണ് ഒല എസ്1 ഇലക്ട്രിക് സ്കൂട്ടറിന്റെ വില. ഒല എസ്1-നായുള്ള ഔദ്യോഗിക ബുക്കിങ് 2021 സെപ്റ്റംബർ 8 മുതൽ ആരംഭിക്കും. ഒക്ടോബറിൽ 1000 നഗരങ്ങളിലും പട്ടണങ്ങളിലുമായി വിതരണവും തുടങ്ങും.
മികച്ച ഡിസൈനിൽ പൂർണമായും ഇന്ത്യയിലാണ് ഒല എസ്1 ഇലക്ട്രിക് സ്കൂട്ടറുകളുടെ നിർമാണം. ഇരട്ട ഹെഡ് ലാമ്പുകൾ, ഫ്ളൂയിഡിക് ബോഡി, മികച്ച അലോയ് വീലുകൾ, മികച്ച സീറ്റുകള്, രണ്ടു ഹെൽമെറ്റുകൾക്ക് അനുയോജ്യമായ ഏറ്റവും വലിയ ബൂട്ട് സ്പേസ് എന്നിവയാണ് പ്രധാന സവിശേഷതകൾ.
ഈ വിഭാഗത്തിലെ ഏറ്റവും മികച്ച സ്പീഡാണ് (മണിക്കൂറിൽ 115 കിലോ മീറ്റർ) ഒല എസ്1 വാഗ്ദാനം ചെയ്യുന്നത്. മൂന്ന് സെക്കൻഡിനുള്ളിൽ 0-40 കിലോമീറ്റർ വേഗത കൈവരിക്കാനാവും. ഒറ്റച്ചാർജിൽ 181 കിലോമീറ്റർ വരെ സഞ്ചരിക്കാം. ഈ വിഭാഗത്തിലെ ഏറ്റവും ശക്തമായ ഹൈപ്പർഡ്രൈവ് മോട്ടോറാണ് വാഹനത്തിന് കരുത്തേകുക. 3.97 കി. വാട്ട് ബാറ്ററി ഒറ്റചാർജിൽ 181 കിലോമീറ്റർ പരിധിക്ക് ആവശ്യമായ വൈദ്യുതി സംഭരിക്കും. ബാറ്ററി മാനേജ്മെന്റ് സിസ്റ്റവുമുണ്ട്.
ഇരുചക്രവാഹനങ്ങളിൽ ഇതുവരെ ലഭ്യമായതിൽ ഏറ്റവും നൂതനമായ സാങ്കേതികവിദ്യയാണ് ഓല എസ്1 കൊണ്ടുവരുന്നത്. ഒക്ടാ-കോർ പ്രോസസർ, 3 ജിബി റാം, 4ജി, വൈഫൈ, ബ്ലൂടൂത്ത് എന്നിവയിലൂടെയുള്ള അതിവേഗ കണക്റ്റിവിറ്റി എന്നിവക്കൊപ്പം ഒല സ്വന്തമായി രൂപകൽപന ചെയ്ത സ്മാർട്ട് വിസിയു, വാഹനത്തിന് ഈ വിഭാഗത്തിലെ ഏറ്റവും മികച്ച പ്രകടനം നൽകും. 7 ഇഞ്ച് ടച്ച് സ്ക്രീൻ ഡിസ്പ്ലേകളോടെയാണ് അഡ്വാൻസ്ഡ് എച്ച്എംഐ. താക്കോൽ ഇല്ലാതെ സ്മാർട്ട് ഫോൺ വഴിതന്നെ സ്കൂട്ടർ തനിയെ ലോക്ക് ആവുകയും അണ്ലോക്ക് ആവുകയും ചെയ്യും. വോയ്സ് റെക്കഗ്നിഷനാണ് മറ്റൊരു സവിശേഷത.
മൂവ് ഒഎസ് അധിഷ്ഠിതമായ ഓല മൂഡ്സ്, യാത്രാനുഭവത്തെ മറ്റൊരു തലത്തിലെത്തിക്കും. ഈ വിഭാഗത്തിലെ ഏറ്റവും നിശബ്ദമായ സ്കൂട്ടർ അനുഭവവും ഇത് സമ്മാനിക്കും. ബോൾട്ട്, കെയർ, വിന്റേജ്, വണ്ടർ എന്നിങ്ങനെ വ്യത്യസ്തമായ ശബ്ദ ഭാവങ്ങൾ റൈഡറുടെ താല്പര്യമനുസരിച്ച് തെരഞ്ഞെടുക്കാനുള്ള സംവിധാവും ഒല എസ്1 സീരിസിലുണ്ട്. നോർമൽ, സ്പോർട്സ്, ഹൈപ്പർ എന്നിങ്ങനെ മൂന്ന് റൈഡ് മോഡുകളുമുണ്ട്.
ആന്റിതെഫ്റ്റ് അലേർട്ട് സിസ്റ്റം, ജിയോ ഫെൻസിംങ് തുടങ്ങിയവ ഉൾക്കൊള്ളിച്ച് സുരക്ഷാ സവിശേഷതകളിലും ഏറെ മുന്നിലാണ് ഒല എസ്1. മുന്നിലും പിന്നിലുമുള്ള ഡിസ്ക് ബ്രേക്കുകൾ യാത്രക്കാരനെ നഗര ബ്ലോക്കുകളിലും, ട്രാഫിക്കിലും സുരക്ഷിതനാക്കും. ഹിൽ ഹോൾഡ് സംവിധാനം, നാവിഗേഷൻ എളുപ്പമാക്കുകയും ചെയ്യും. 499 രൂപക്ക് ഇപ്പോൾ ഒല എസ്1 റിസർവ് ചെയ്യാനാവും.
