ന്യൂഡൽഹി: ഗൂഗിൾ ഇന്ത്യയിൽ വയർലെസ് ഇയർബഡ് പുറത്തിറക്കി. ഇന്റർനെറ്റ് സെർച്ച് ഭീമനായ ഗൂഗിൾ ആദ്യമായാണ് ഇന്ത്യയിൽ വയർലെസ് ഇയർബഡുകൾ പുറത്തിറക്കുന്നത്. പിക്സൽ ബഡ്സ് എ സീരീസാണ് പുറത്തിറക്കിയത്. നേരത്തെ അമേരിക്കയിൽ ഈ മോഡൽ പുറത്തിറക്കിയിരുന്നു. 99 ഡോളറാണ് അമേരിക്കയിൽ പിക്സൽ ബഡ്സിന്റെ വില. 9,999 രൂപയാണ് ഇന്ത്യയിൽ ഇതിന് വില നിശ്ചയിച്ചിരിക്കുന്നത്.
ഓഗസ്റ്റ് 25 മുതൽ ഫ്ളിപ്കാർട്ട്, റിലയൻസ് ഡിജിറ്റൽ, ടാറ്റ ക്ലിക്ക് എന്നിവടങ്ങളിലൂടെ പിക്സൽ ബഡ്സ് എ സീരീസ് വാങ്ങാമെന്ന് കമ്പനി അറിയിച്ചു. ദിവസങ്ങൾക്കുള്ളിൽ കൂടുതൽ ചെറുകിട ഔട്ട്ലൈറ്റിലൂടെ ഉല്പന്നം ലഭ്യമാക്കുമെന്നും കമ്പനി അറിയിച്ചു.
വെളള നിറത്തിലാണ് ഗൂഗിളിന്റെ വയർലെസ് ഇയർബഡ് ലഭ്യമാവുക. 12 എംഎം ഡൈനാമിക് സ്പീക്കർ ഡ്രൈവറുകൾ ഇയർ ബഡ്സിന്റെ പ്രത്യേകതയായി കമ്പനി പറയുന്നു. ചെവിയിലെ മർദ്ദം കുറയ്ക്കുന്നതിനായി പ്രത്യേക വെന്റുൾപ്പടെയാണ് ഇയർ ബഡ്സ് പുറത്തിറങ്ങുന്നത്. ഗൂഗിൾ അസിസ്റ്റന്റുമായി ഉപകരണത്തെ ബന്ധിപ്പിച്ച് ഉപയോഗിക്കാനും സാധിക്കും
കൂടാതെ പിക്സൽ ബഡ്സ് എ സീരീസ് ഹിന്ദി, തമിഴ്, ബംഗാളി, എന്നിവയുൾപ്പടെ നാൽപ്പതിലധികം ഭാഷകളിലുള്ള സേവനം, ഒരൊറ്റ ചാർജിൽ തുടർച്ചയായ അഞ്ച് മണിക്കൂർ ശ്രവണസമയം, ഇരുപത്തിനാല് മണിക്കൂർ ബാറ്ററി ലൈഫ് എന്നീ പ്രത്യേകതകളും കമ്പനി അവകാശപ്പെടുന്നു.
Comments