കൊച്ചി: കണ്ണൻ താമരക്കുളം സംവിധാനം ചെയ്യുന്ന ‘മരട് 375’ ന്റെ പേര് മാറ്റി അണിയറ പ്രവർത്തകർ. ‘വിധി: ദി വെർഡിക്ട്’ എന്നാണ് ചിത്രത്തിന്റെ പുതിയ പേര്. ഹൈക്കോടതി നിർദ്ദേശത്തെ തുടർന്നാണിത്. മരട് ഫ്ലാറ്റ് പൊളിക്കൽ പ്രമേയമാക്കി പുറത്തിറങ്ങുന്ന ചിത്രത്തിനെതിരെ പൊളിച്ച ഫ്ലാറ്റുകളുടെ നിർമ്മാതാക്കളാണ് ഹർജി നൽകിയത്.
2021 മാർച്ച് 19ന് തീയേറ്ററിൽ റിലീസ് ചെയ്യാനിരിക്കവെ എറണാകുളം മുൻസിഫ് കോടതി ചിത്രത്തിന്റെ പ്രദർശനം തടഞ്ഞിരുന്നു. തുടർന്ന് കേസ് ഹൈക്കോടതിയ്ക്ക് വിടുകയായിരുന്നു. ഹൈക്കോടതി വിചാരണയ്ക്ക് ശേഷം തീരുമാനമെടുക്കാനായി മിനിസ്ട്രിയ്ക്ക് കൈമാറി. ഒടുവിൽ എട്ട് മാസത്തിന് ശേഷം വന്ന വിധിയിലാണ് ചിത്രത്തിന്റെ പേര് മാറ്റാൻ നിർദ്ദേശിക്കുന്നത്. ഇതിന്റെ അടിസ്ഥാനത്തിലാണ് ‘മരട് 375’ എന്ന പേര് മാറ്റി ‘വിധി: ദി വെർഡിക്ട്’ എന്നാക്കിയത്.
പട്ടാഭിരാമൻ എന്ന ചിത്രത്തിന് ശേഷം കണ്ണൻ താമരക്കുളം സംവിധാനം ചെയ്ത ചിത്രമാണ് മരട് 375. അനൂപ് മേനോൻ, ധർമ്മജൻ, ഷീലു എബ്രഹാം, നൂറിൻ ഷെരീഫ്, മനോജ് കെ ജയൻ തുടങ്ങിയവരാണ് ചിത്രത്തിൽ പ്രധാന വേഷത്തിലെത്തുന്നത്. അബാം മൂവീസിന്റെ ബാനറിൽ അബ്രഹാം മാത്യുവും സ്വർണലയ സിനിമാസിന്റെ ബാനറിൽ സുദർശൻ കാഞ്ഞിരംകുളവും ചേർന്നാണ് നിർമ്മാണം.
