യുകെ: കൊറോണ മഹാമാരിയെ പ്രതിരോധിക്കാൻ നിലവിൽ ഏറ്റവും ഫലപ്രദമായ മാർഗമായി കണക്കാക്കുന്നത് വാക്സിനേഷൻ തന്നെയാണ്. എന്നാൽ ജനിതകവ്യതിയാനങ്ങൾ സംഭവിച്ച വൈറസുകൾ വീണ്ടും ആശങ്ക സൃഷ്ടിക്കുകയാണ്.
ഇന്ത്യയിൽ കണ്ടെത്തപ്പെട്ട ഡെൽറ്റ വകഭേദത്തിലുള്ള വൈറസാണ് ഇക്കൂട്ടത്തിൽ ഏറ്റവും വെല്ലുവിളിയാകുന്നത്. വാക്സിൻ സ്വീകരിച്ചവരിൽ പോലും ഡെൽറ്റ രോഗമെത്തുന്നതായി പല പഠനങ്ങളും ചൂണ്ടിക്കാട്ടുന്നു.
ഡെൽറ്റക്കെതിരെ ഫലപ്രദമായി പ്രവർത്തിക്കാൻ വാക്സിനുകൾക്ക് സാധിക്കില്ലെന്നാണ് പുതിയ പഠന റിപ്പോർട്ട്. യുകെയിലെ ഓക്സ്‌ഫോർഡ് യൂണിവേഴ്സിറ്റിയിൽ നിന്നുള്ള ഗവേഷകരുടെ നേതൃത്വത്തിലാണ് പഠനം നടന്നത്.
മുപ്പത് ലക്ഷത്തിലധികം പേരുടെ പിസിആർ ഫലങ്ങളെ അടിസ്ഥാനപ്പെടുത്തിയാണ് പഠനം. വാക്സിനുകൾക്ക് ഡെൽറ്റയെ ഫലപ്രദമായ തടയാനാകില്ലെന്നാണ് യുകെ ഗവേഷകർ സ്ഥിരീകരിച്ചിരിക്കുന്നത്. വാക്സിനേഷനിലൂടെ ആകെ ജനസംഖ്യയുടെ വലിയൊരു വിഭാഗത്തിനും കൊറോണയക്കെതിരെ പ്രതിരോധശക്തി ആർജ്ജിച്ചെടുക്കാമെന്ന വാദത്തിനും പഠനം സംശയം പ്രകടിപ്പിക്കുന്നു. വാക്സിൻ സ്വീകരിച്ച് മാസങ്ങൾക്കുള്ളിൽ തന്നെ രോഗത്തിനെതിരായി പ്രവർത്തിക്കാനുള്ള കഴിവ് നഷ്ടപ്പെടുന്നു എന്ന പഠനം വ്യക്തമാക്കുന്നു.
