ഇന്ത്യന് നിരത്തുകള്ക്ക് വേണ്ടി അണിയിച്ചൊരുക്കിയ കുഞ്ഞന് എസ് യുവിയുടെ പേരും ചിത്രവും ഔദ്യോഗികമായി പുറത്തുവിട്ട് ടാറ്റ മോട്ടോഴ്സ്. എച്ച്2എക്സ്, എച്ച്ബിഎക്സ്, തുടങ്ങിയ കോഡ് നാമത്തിൽ അറിയപ്പെട്ടിരുന്ന വാഹനത്തിന് പഞ്ച് എന്നാണ് ടാറ്റ പേരിട്ടിരിക്കുന്നത്. സെപ്റ്റംബര് അവസാനത്തോടെയോ ഒക്ടോബര് ആദ്യമോ ഈ വാഹനം വിപണിയിലേക്ക് എത്തിക്കുമെന്നാണ് സൂചന.
ഇംപാക്ട് 2.0 ഡിസൈന് ലാംഗ്വജില് ടാറ്റയുടെ അല്ഫ-ആര്ക്ക് അടിസ്ഥാനമാക്കി നിര്മിക്കുന്ന ആദ്യ എസ് യുവിയാണ് പഞ്ച്. പ്രീമിയം ഹാച്ച്ബാക്ക് മോഡലായ അല്ട്രോസാണ് അല്ഫ പ്ലാറ്റ്ഫോമില് എത്തിയ ആദ്യ വാഹനം. എല്.ഇ.ഡി. ഡി.ആര്.എല്, ബമ്പറില് സ്ഥാനം പിടിച്ചിട്ടുള്ള ഹെഡ്ലാമ്പ്, ക്രോമിയം ലൈനുകള് തുടങ്ങിയ നിരവധി സവിശേഷതകൾ ഫസ്റ്റ് ലുക്ക് ചിത്രത്തിൽ കാണാനാകും.
കണ്സെപ്റ്റ് മോഡലിനോട് നീതി പുലര്ത്തിയാണ് പ്രൊഡക്ഷന് പതിപ്പും ടാറ്റ അവതരിപ്പിച്ചിരിക്കുന്നത്. എന്നാൽ വാഹനത്തെ സംബന്ധിക്കുന്ന മറ്റ് വിവരങ്ങളൊന്നും ടാറ്റ പുറത്തുവിട്ടിട്ടില്ല. ടിയാഗോ, അല്ട്രോസ് തുടങ്ങിയവയ്ക്ക് സമാനമായ ഇന്റീരിയർ, ടിയാഗോയല് നല്കിയിട്ടുള്ള പെട്രോള് എന്ജിൻ അങ്ങനെ നിരവധി കഥകൾ പ്രചരിക്കുന്നുണ്ടെങ്കിലും ഇതിനോട് ടാറ്റ പ്രതികരിച്ചിട്ടില്ല.
