ലോക്ക്ഡൗണ് കാലത്ത് ഒരു കപ്പ് കാപ്പിയില് തുടങ്ങിയ പരിചയം പിന്നീട് സൗഹൃദത്തിലേക്കും പ്രണയത്തിലേക്കും വഴിമാറി ഇപ്പോള് വിവാഹത്തിലെത്തിയിരിക്കുകയാണ്. ഇംഗ്ലണ്ടുകാരി മിരാന്ഡയും (മിമി) കോവളം സ്വദേശി അരുണ് ചന്ദ്രനും (കണ്ണപ്പന്) ആണ് വിവാഹിതരായത്. 2020 മാര്ച്ചിലാണ് ലണ്ടനില് സ്വകാര്യ സംരംഭകയായ മിരാന്ഡ ആദ്യമായി കോവളത്ത് എത്തുന്നത്. അതിനിടെ കൊറോണ വ്യാപിച്ചതോടെ ലോക്ഡൗണില് നാടും നഗരവും സ്തംഭിച്ചു. ഇതോടെ മിരാന്ഡയുടെ മടക്കയാത്ര മുടങ്ങി. മിരാന്ഡ താമസിച്ചിരുന്ന വീട്ടില് ഓമനിച്ചു വളര്ത്തിയ ഒരു നായ്ക്കുട്ടിയും ഉണ്ടായിരുന്നു.
ഒരു ദിവസം നായ പുറത്തേക്ക് ഓടിയതും സമീപവാസിയായ അരുണ് ചന്ദ്രന് നായയെ പിടികൂടി തിരികെ ഏല്പ്പിച്ചതും ആ സന്തോഷത്തില് മിരാന്ഡ ഒരു കപ്പ് കാപ്പിയ്ക്ക് ക്ഷണിച്ചതുമാണ് ഇരുവരുടെയും ജീവിതത്തില് വഴിത്തിരിവായത്. പരിചയം പിന്നീട് പ്രണയമായി. അവര് ഒന്നിച്ചു ജീവിക്കാന് തീരുമാനിച്ചു. ഇതിനിടെ സായി എന്ന ആണ്കുട്ടിയും പിറന്നു. സായി ആര്തര് ലിറ്റില് ഫുഡ് എന്നാണ് മുഴുവന് പേര്. അതിനിടെയാണ് ഇരുവരും വിവാഹതിരാവാന് തീരുമാനിച്ചത്.
അങ്ങനെ കഴിഞ്ഞ ദിവസം കോവളം ആവാടുതുറ ദേവീക്ഷേത്രത്തില് വെച്ച് താലി ചാര്ത്തി പുതുജീവിതം ആരംഭിച്ചു. മകന് മൂന്നര മാസം പ്രായമുള്ള സായി ഉള്പ്പെടെ കണ്ണപ്പന്റെ ബന്ധുക്കളും മിമിയുടെ സുഹൃത്തുക്കളും ചടങ്ങിന് സാക്ഷിയായി. കൊറോണ വ്യാപനം കുറഞ്ഞ് ലോകം സാധാരണ നിലയിലേക്ക് എത്തുമ്പോള് നാട്ടിലേക്ക് തിരികെ പോകാനാണ് ഇവരുടെ തീരുമാനം.
Comments