മുംബൈ: മത്സരം വിജയിക്കുന്നവർക്ക് മാത്രമുള്ളതല്ല. മികച്ച പ്രകടനം കാഴ്ചവെക്കുന്നവരും താരങ്ങളാണ്. ടോക്കിയോ ഒളിമ്പിക്‌സിൽ വെങ്കല മെഡലിനരികെ എത്തിയിട്ടും മെഡൽ നഷ്ടമായവർക്ക് ആൾട്രോസ് സമ്മാനമായി നൽകി ടാറ്റാ മോട്ടോഴ്സ്. ഹൈ സ്ട്രീറ്റ് ഗോൾഡ് നിറത്തിലുള്ള ആൾട്രോസ് പ്രീമിയം ഹാച്ബാക്കാണ് താരങ്ങൾക്ക് സമ്മാനിച്ചത്.
ഹോക്കി, ഗുസ്തി, ഗോൾഫ്, ബോക്‌സിംഗ്, ഡിസ്‌കസ് ത്രോ തുടങ്ങിയ വിഭാഗങ്ങളിലായി മാറ്റുരച്ച 24 ഒളിമ്പ്യൻമാരെയാണ് ടാറ്റ മോട്ടോഴ്സ് ആദരിച്ചത്.
മെഡൽ നേടുക എന്നതിലുപരി രാജ്യത്തെ പ്രതിനിധീകരിച്ച് ഒളിമ്പിക്സ് പോലുള്ള മത്സരങ്ങളിൽ പങ്കെടുത്തവരുടെ പ്രയത്നങ്ങൾ ചെറുതല്ല. മെഡൽ കൈവരിച്ചില്ലെങ്കിലും രാജ്യത്തെ നൂറു കോടി ജനങ്ങളുടെ ഹൃദത്തിൽ ഇടം പിടിക്കാൻ ഈ കായിക താരങ്ങൾക്ക് സാധിച്ചു. ഇന്ത്യയിലെ വളർന്നു വരുന്ന മറ്റു കായികതാരങ്ങൾക്ക് ഇതൊരു പ്രചോദനമാവുമെന്ന് ടാറ്റാ മോട്ടോഴ്സ് പറഞ്ഞു.
കായിക താരങ്ങളുടെ മിന്നും പ്രകടങ്ങളിൽ രാജ്യം അഭിമാനം കൊള്ളുന്നു. അവരുടെ പ്രയത്നങ്ങൾ വരും തലമുറയ്‌ക്ക് മാതൃകയാകുമെന്ന് ടാറ്റാ മോട്ടോഴ്സ് പാസഞ്ചർ വെഹിക്കിൾ ബിസിനസ് പ്രസിഡന്റ് ശൈലേഷ് ചന്ദ്ര പറഞ്ഞു.
ടാറ്റയുടെ പ്രീമിയം ഹാച്ബാക്കാണ് ആൾട്രോസ്. കഴിഞ്ഞ വർഷം പുറത്തിറക്കിയ വാഹനത്തിന് ഗ്ലോബൽ എൻസിഎപിയുടെ 5-സ്റ്റാർ സുരക്ഷ ഉറപ്പു നൽകിയിരുന്നു.
