‘കഴിയുന്നിടത്തോളം കാലം നിങ്ങളെ രസിപ്പിക്കുന്നത് തുടരണമെന്നാണ് ആഗ്രഹം’: ആശംസകൾക്ക് നന്ദി പറഞ്ഞ് മമ്മൂട്ടി

പിറന്നാൾ ദിനത്തിൽ ആശംസകൾ അറിയിച്ചവർക്ക് നന്ദി പറഞ്ഞ് പ്രിയതാരം മമ്മൂക്ക. വ്യക്തിപരമായി അറിയാവുന്നവരും ഒപ്പം തന്നെ നേരിൽ ഇതുവരെ കാണാത്തവരും ഒരേ അളവിൽ തനിക്ക് സ്‌നേഹം നൽകുന്നുവെന്ന് താരം പറഞ്ഞു. പിറന്നാൾ വലിയ രീതിയിൽ ആഘോഷിക്കുന്നതിനോട് പൊതുവെ താത്പര്യമില്ല. എന്നാൽ ഇതുവരെ താൻ നേരിൽ കണ്ടിട്ടില്ലാത്ത സിനിമാ ആസ്വാദകർ പോലും ആശംസകൾ അറിയിക്കുമ്പോൾ താൻ അനുഗൃഹീതനാണെന്ന് തോന്നുന്നുവെന്ന് മമ്മൂട്ടി പറഞ്ഞു.

മമ്മൂട്ടിയുടെ വാക്കുകൾ ഇങ്ങനെ ‘പിറന്നാൾ ദിനത്തിൽ ലഭിച്ച സ്‌നേഹം എന്നെ കീഴടിക്കിയിരിക്കുന്നു. ഈ സ്‌നേഹത്തിന് മുന്നിൽ ഞാൻ അനുഗൃഹീതനാണ്. എന്നെ വ്യക്തിപരമായി അറിയാവുന്നവരും ഇതുവരെ കണ്ടിട്ടില്ലാത്തവരും അവരുടെ സ്‌നേഹം തുല്യ അളവിൽ പ്രകടിപ്പിച്ചിട്ടുണ്ട്. മുഖ്യമന്ത്രി അടക്കമുള്ള നേതാക്കൾ, അമിതാഭ് ബച്ചൻ, മോഹൻലാൽ, കമൽ ഹാസൻ തുടങ്ങി സിനിമാ മേഖലയിലെ നടന്മാരും സാങ്കേതിക പ്രവർത്തകരും അടക്കമുള്ളവർ, മാദ്ധ്യമ പ്രവർത്തകർ, രാജ്യത്തുടനീളമുള്ള ഓൺലൈൻ പേജുകൾ… എല്ലാ പ്രേക്ഷകരും സിനിമാസ്വാധകരും എനിക്ക് അയച്ച സ്‌നേഹം വിലമതിക്കാനാകാത്തതാണ്.

എല്ലത്തിലും ഉപരി തങ്ങളുടെ ആഘോഷങ്ങൾ പങ്കുവെച്ചുകൊണ്ട് പ്രേക്ഷകർ അവരുടെ സ്‌നേഹം അറിയിച്ചതാണ് തന്നെ ഏറ്റവും അധികം സ്പർശിച്ചത്. പിറന്നാൾ വലിയ രീതിയിൽ ആഘോഷിക്കുന്നതിനോട് പൊതുവെ താത്പര്യമില്ലാത്ത ആളണ് ഞാൻ. എന്നാൽ എനിക്ക് അറിയാവുന്നവരും വ്യക്തിപരമായി അറിയാത്തവരുമായ ആളുകൾ എന്നെ സ്വന്തം കുടുംബാംഗത്തെപ്പോലെ കണ്ട് ഈ ദിവസം പ്രത്യേകതയുള്ളതാക്കി. ഞാൻ യഥാർത്ഥത്തിൽ അനുഗ്രഹിക്കപ്പെട്ടവനാണെന്ന് തോന്നിപ്പോയ നിമിഷം. കഴിയുന്നിടത്തോളം കാലം എല്ലാവരേയും രസിപ്പിക്കുന്നത് തുടരണമെന്നാണ് എനിക്ക്. സ്‌നേഹവും പ്രാർത്ഥനയും … മമ്മൂട്ടി’