ന്യൂഡൽഹി: വരാനിരിക്കുന്ന നിയമസഭാ തിരഞ്ഞെടുപ്പ് മുന്നിൽ കണ്ട് വിവിധ ദേശീയ നേതാക്കൾക്ക് തിരഞ്ഞെടുപ്പ് ചുമതലയേൽപ്പിച്ച് ബിജെപി. മഹാരാഷ്ട്ര മുൻ മുഖ്യമന്ത്രി ദേവേന്ദ്ര ഫഡ്നാവിസിനാണ് ഗോവയിൽ അടുത്ത വർഷം നടക്കാനിരിക്കുന്ന തിരഞ്ഞെടുപ്പിന്റെ ചുമതല ലഭിച്ചിരിക്കുന്നത്. കേന്ദ്രമന്ത്രി ജി. കിഷൻ റെഡ്ഡി, എം.പി ദർശന ജർദോഷ് എന്നിവരും സംസ്ഥാനത്ത് തിരഞ്ഞെടുപ്പ് ചുമതലയേൽക്കും.
2022ൽ നിയമസഭാ തിരഞ്ഞെടുപ്പ് നടക്കാനിരിക്കുന്ന ഉത്തർപ്രദേശ്, ഉത്തരാഖണ്ഡ്, ഗോവ, മണിപ്പൂർ, പഞ്ചാബ് എന്നിവിടങ്ങളിലാണ് വിവിധ കേന്ദ്രമന്ത്രിമാർക്കും എംപിമാർക്കുമായി ബിജെപി തിരഞ്ഞെടുപ്പ് ചുമതല നൽകിയിരിക്കുന്നത്.
ഉത്തർപ്രദേശിൽ കേന്ദ്ര വിദ്യാഭ്യാസമന്ത്രി ധർമേന്ദ്ര പ്രധാനും ഉത്തരാഖണ്ഡിൽ കേന്ദ്ര പാർലമെന്ററികാര്യ മന്ത്രി പ്രഹ്ലാദ് ജോഷിക്കുമാണ് നിയമസഭാ തിരഞ്ഞെടുപ്പിന്റെ ചുമതല. കേന്ദ്രമന്ത്രി ഗജേന്ദ്രസിങ് ശേഖാവത്തിന് പഞ്ചാബിൽ പ്രധാന ചുമതല നൽകിയപ്പോൾ കേന്ദ്രമന്ത്രിമാരായ ഹർദീപ് സിംഗ് പുരിയെയും മീനാക്ഷി ലേഖിയെയും അധിക ചുമതലയേൽപ്പിച്ചു. മണിപ്പൂരിൽ കേന്ദ്രമന്ത്രി ഭൂപേന്ദ്ര യാദവിനാണ് തിരഞ്ഞെടുപ്പിന്റെ ഭാരവാഹിത്വം നൽകിയത്. പ്രതിമ ഭൗമിക്, അശോക് സിംഗൽ എന്നീ മന്ത്രിമാർക്കും മണിപ്പൂരിൽ അധിക ചുമതല നൽകി.
