ന്യൂഡൽഹി: രാജ്യത്ത് ഒറ്റദിവസം രണ്ട് കോടി വാക്സിൻ വിതരണം ചെയ്തതിൽ ആരോഗ്യപ്രവർത്തകർക്ക് അഭിനന്ദനവുമായി പ്രധാനമന്ത്രി നരേന്ദ്രമോദി. ഇന്ന് ഒരോ ഇന്ത്യൻ പൗരനും അഭിമാനിക്കും. റെക്കോർഡ് നേട്ടം കൈവരിക്കാനായതിന്റെ അംഗീകാരം രാജ്യത്തെ ഡോക്ടർമാർ, നഴ്സുമാർ, മുന്നണി പോരാളികൾ, ആരോഗ്യപ്രവർത്തകർ എന്നിവർക്കുള്ളതാണെന്നും കൊറോണയെ തോൽപ്പിക്കാൻ വാക്സിനേഷൻ പരമാവധി വർദ്ധിപ്പിക്കണമെന്നും മോദി പറഞ്ഞു.
Every Indian would be proud of today’s record vaccination numbers.
I acknowledge our doctors, innovators, administrators, nurses, healthcare and all front-line workers who have toiled to make the vaccination drive a success. Let us keep boosting vaccination to defeat COVID-19.
— Narendra Modi (@narendramodi) September 17, 2021
വൈകിട്ട് 9.24 വരെയുള്ള കണക്കുകൾ പ്രകാരം ഇന്ത്യയിൽ രണ്ട് കോടി 24 ലക്ഷത്തിലധികം ഡോസുകളാണ് വിതരണം ചെയ്തത്. പ്രധാനമന്ത്രിയുടെ 71-ാം ജന്മദിനത്തിൽ മോദിക്ക് അവിസ്മരണീയമായ സമ്മാനം നൽകുകയെന്ന ലക്ഷ്യത്തോടെയായിരുന്നു വാക്സിനേഷൻ രണ്ട് കോടി കടത്തിയത്. പ്രതിരോധ വാക്സിനേഷനിൽ ചരിത്രനേട്ടം കൈവരിക്കാൻ ബിജെപിയുടെയും യുവമോർച്ചയുടെയും പ്രവർത്തകർ ഉൾപ്പെടെ രംഗത്തെത്തിയിരുന്നു.
ഇതിന് മുമ്പ് പലതവണയായി പ്രതിദിനം ഒരു കോടിയിലേറെ ഡോസുകൾ ഇന്ത്യയിൽ വിതരണം നടത്തിയിട്ടുണ്ട്. വാക്സിനേഷനിൽ ഇനിയുമേറെ നാഴിക കല്ലുകൾ പിന്നിടാനുള്ള ശ്രമങ്ങൾ രാജ്യത്ത് തുടരുകയാണ്. അടുത്ത മാസം പകുതിയോടെ 100 കോടി വാക്സിൻ ഡോസുകൾ വിതരണം ചെയ്യുകയാണ് സർക്കാരിന്റെ ലക്ഷ്യം.
അതേസമയം ഗോവയിൽ 18 വയസിന് മുകളിലുള്ള 100 ശതമാനം പേർക്കും ആദ്യ ഡോസ് കുത്തിവെയ്പ്പ് പൂർത്തിയായതിന്റെ പശ്ചാത്തലത്തിൽ ആരോഗ്യപ്രവർത്തകരുമായി പ്രധാനമന്ത്രി നാളെ കൂടിക്കാഴ്ച നടത്തും. വീഡിയോ കോൺഫറൻസ് വഴി രാവിലെ 10.30നാണ് കൂടിക്കാഴ്ച. ഗോവ മുഖ്യമന്ത്രി പ്രമോദ് സാവന്തും യോഗത്തിൽ പങ്കെടുക്കും.
