ന്യൂഡൽഹി : സിപിഐ നേതാവ് കനയ്യകുമാർ കോൺഗ്രസിൽ ചേരുമെന്ന അഭ്യൂഹങ്ങൾ വീണ്ടും സജീവമാകുന്നു. കോൺഗ്രസുമായി ബന്ധപ്പെട്ട അടുത്ത വൃത്തങ്ങളാണ് ഇതുമായി ബന്ധപ്പെട്ട സൂചനകൾ നൽകുന്നത്. കനയ്യകുമാറിനൊപ്പം ഗുജറാത്ത് എംഎൽഎ ജിഗ്നേഷ് മേവാനിയും കോൺഗ്രസിൽ ചേരുമെന്നാണ് അഭ്യൂഹം.
മഹാത്മാഗാന്ധിയുടെ ജന്മവാർഷികമായ ഒക്ടോബർ രണ്ടിന് ഇരുവരും കോൺഗ്രസ് അംഗത്വം സ്വീകരിക്കുമെന്നാണ് റിപ്പോർട്ടുകൾ. നേരത്തെ സെപ്തംബർ 28 ന് കോൺഗ്രസിൽ ചേരാനായിരുന്നു തീരുമാനം. പിന്നീട് ഇത് ഒക്ടോബർ രണ്ടിലേക്ക് മാറ്റുകയായിരുന്നു. കനയ്യകുമാറിനൊപ്പം മറ്റ് ചില ഇടത് നേതാക്കൾ കൂടി കോൺഗ്രസ് അംഗത്വം സ്വീകരിക്കുമെന്നും സൂചനകളുണ്ട്.
നേരത്തെയും കനയ്യകുമാർ കോൺഗ്രസിൽ ചേരുമെന്ന തരത്തിൽ അഭ്യൂഹങ്ങൾ പുറത്തുവന്നിരുന്നു. ഇതിന് പിന്നാലെ അദ്ദേഹത്തിന്റെ രാഹുൽ ഗാന്ധിയുമായുള്ള കൂടിക്കാഴ്ച ഈ അഭ്യൂഹങ്ങൾക്ക് ബലം നൽകിയിരുന്നു. എന്നാൽ കോൺഗ്രസിൽ ചേരില്ലെന്നും, മറ്റ് വിഷയങ്ങൾ ചർച്ച ചെയ്യാനാണ് രാഹുലിനെ കണ്ടതെന്നുമായിരുന്നു കനയ്യയുടെ പ്രതികരണം. വെള്ളിയാഴ്ചയായിരുന്നു കനയ്യകുമാർ രാഹുൽ ഗാന്ധിയുമായി കൂടിക്കാഴ്ച നടത്തിയത്. ഇതിന് പിന്നാലെ കാനം രാജേന്ദ്രൻ ഉൾപ്പെടെയുള്ള സിപിഐ നേതാക്കൾ കനയ്യ കോൺഗ്രസിൽ ചേരുമെന്ന വാർത്തകളെ വിമർശിച്ച് രംഗത്ത് വന്നിരുന്നു.
ബീഹാറിൽ പുതിയ കോൺഗ്രസ് അദ്ധ്യക്ഷനെ തെരഞ്ഞെടുക്കാനുള്ള നീക്കങ്ങൾക്കിടെയാണ് കനയ്യകുമാറും രാഹുൽ ഗാന്ധിയും തമ്മിലുള്ള കൂടിക്കാഴ്ച നടന്നത്. കോൺഗ്രസിൽ ചേരുന്ന കനയ്യയ്‌ക്കും, ജിഗ്നേഷ് മേവാനിയ്‌ക്കും പാർട്ടി പ്രധാന പദവികൾ നൽകാനാണ് സാദ്ധ്യത.
