ലക്നൗ: വരാനിരിക്കുന്ന ഉത്തർപ്രദേശ് തിരഞ്ഞെടുപ്പിൽ ബിജെപി വിജയം കൊയ്ത് വീണ്ടും അധികാരത്തിലെത്തുമെന്ന് നിയമസഭാംഗം രവി കിഷൻ. അയോദ്ധ്യയിൽ അരങ്ങേറുന്ന രാമലീലയിൽ പങ്കെടുക്കുന്ന വേളയിലാണ് കിഷന്റെ ഈ പ്രസ്താവന.
‘ബിജെപി അധികാരത്തിൽ എത്തിയശേഷം രാജ്യത്ത് പ്രകടമായ മാറ്റങ്ങളാണ് കാണാൻ സാധിക്കുന്നത്. ജനങ്ങൾ പരസ്പര സഹകരണത്തോടെയും ബഹുമാനത്തോടെയുമാണ് ജീവിക്കുന്നത്. ഗ്രാമങ്ങൾ ഉൾപ്പെടെ വികസനത്തിന്റെ പാതയിലാണ്. രാജ്യത്തെ യുവതലമുറയ്ക്കും സ്ത്രീകൾക്കുമായി നിരവധി പദ്ധതികൾ കേന്ദ്ര സർക്കാർ ആവിഷ്കരിച്ചിട്ടുണ്ട്. സ്ത്രീകൾക്ക് വിദ്യാഭ്യാസം നൽകുന്നതിലും സർക്കാർ വിജയിച്ചു. കൂടാതെ മികച്ച ആരോഗ്യ സംവിധാനങ്ങളും ഇന്ന് രാജ്യത്തുണ്ട്. ഇന്ത്യയുടെ ഭാവിയെ കുറിച്ച് കുട്ടിക്കാലത്ത് മനസ്സിൽ ആഗ്രഹിച്ച പല കാര്യങ്ങളും ഇന്ന് മോദി സർക്കാർ നടത്തി കാണിച്ചു തന്നു’ രവി കിഷൻ പറഞ്ഞു.
അയോദ്ധ്യയിൽ നിർമ്മാണം പുരോഗമിക്കുന്ന രാമക്ഷേത്ര ഭൂമിയിൽ എത്താൻ സാധിച്ചത് ഏറ്റവും വലിയ ഭാഗ്യമായി കണക്കാക്കുന്നുവെന്നും അദ്ദേഹം കൂട്ടിച്ചേർത്തു. നവരാത്രി ആഘോഷങ്ങളുടെ ഭാഗമായി അരങ്ങേറുന്ന രാമലീലയിൽ പരുശാരാമന്റെ കഥാപാത്രം അവതരിപ്പിക്കാൻ എത്തിയതാണ് എംപി രവി കിഷൻ.
അടുത്ത വർഷമാണ് ഉത്തർപ്രദേശിലെ 403 നിയമസഭ മണ്ഡലങ്ങളിൽ തിരഞ്ഞെടുപ്പ് നടത്താൻ നിശ്ചയിച്ചിരിക്കുന്നത്.
നടി ഭാഗ്യ ലക്ഷ്മിയാണ് രാമലീലയിൽ സീതാ ദേവിയായി എത്തുന്നത്. രാമ ജന്മഭൂമിയിൽ അരങ്ങറുന്ന രാമലീലയിൽ പങ്കെടുക്കാൻ സാധിച്ചത് ജീവിതത്തിലെ സൗഭാഗ്യമായി കാണുന്നു. ഭഗവാൻ ശ്രീരാമചന്ദ്രന്റെ അനുഗ്രഹം കൊണ്ട് മാത്രമാണ് ഇവിടെ നിൽക്കാൻ കഴിഞ്ഞതെന്ന് ഭാഗ്യ ലക്ഷ്മി പറഞ്ഞു.
തിന്മയുടെ മേൽ നന്മയുടെ വിജയം ആഘോഷിക്കുന്ന നവരാത്രിക്കാലത്ത് വിപുലമായ ആഘോഷങ്ങളാണ് രാജ്യമെമ്പാടും സംഘടിപ്പിച്ചു വരുന്നത്.
