ലോക വിദ്യാർത്ഥി ദിനം: ഓർക്കാം, അബ്ദുൾ കലാമെന്ന അദ്ധ്യാപകനെ..

ഒക്ടോബർ 15.. മുൻ രാഷ്‌ട്രപതി എ.പി.ജെ അബ്ദുൾ കലാമിന്റെ ജന്മദിനം.. ഭാരതത്തിന്റെ ബഹിരാകാശ-പ്രതിരോധ സ്വപ്‌നങ്ങൾക്ക് അഗ്നിച്ചിറകേകിയ കർമയോഗിയുടെ പിറന്നാൾ ദിനം എല്ലാ വർഷവും ലോക വിദ്യാർത്ഥി ദിനം കൂടിയായാണ് നാം ആചരിക്കുന്നത്. ഐക്യരാഷ്‌ട്ര സഭയാണ് ഇതിന് തുടക്കമിട്ടത്.

എന്തുകൊണ്ടാണ് അന്താരാഷ്‌ട്ര വിദ്യാർത്ഥി ദിനം കലാമിന്റെ ജന്മദിനമായ ഒക്‌ടോബർ 15ന് നാം ആഘോഷിക്കുന്നത്..?

ഭാരതത്തിന്റെ മിസൈൽ മാൻ എന്നറിയപ്പെടുന്ന കലാം 2002 മുതൽ 2007 വരെയുള്ള കാലഘട്ടത്തിലാണ് ഇന്ത്യയുടെ രാഷ്‌ട്രപതി സ്ഥാനം അലങ്കരിക്കുന്നത്. 11-ാമത് ഇന്ത്യൻ രാഷ്‌ട്രപതിയായ അദ്ദേഹം ഒരു ബഹിരാകാശ ശാസ്ത്രജ്ഞൻ മാത്രമായിരുന്നില്ല, അദ്ധ്യാപകൻ കൂടിയായിരുന്നു. ഇഷ്ടമേഖല അദ്ധ്യാപനമായതിനാൽ ലോകം കലാമിനെ ഒരദ്ധ്യാപകനായി ഓർക്കണമെന്നായിരുന്നു അദ്ദേഹം ആഗ്രഹിച്ചതും. 2015 ജൂലൈ 27ന് ലോകത്തോട് വിടപറയുമ്പോൾ ഏറെ ഇഷ്ടപ്പെട്ടിരുന്ന അദ്ധ്യാപന വൃത്തിയാണ് അദ്ദേഹം ചെയ്തിരുന്നത്. ഷില്ലോങ്ങിൽ വിദ്യാർത്ഥികളുമായുള്ള പ്രഭാഷണ പരിപാടിക്കിടെ ഹൃദയാഘാതത്താൽ കുഴഞ്ഞുവീണായിരുന്നു കലാമിന്റെ അന്ത്യം. കുട്ടികളോടുള്ള ഇടപെടലും സ്‌നേഹവാത്സല്യങ്ങളും അദ്ധ്യാപനവൃത്തിയോടുള്ള അദ്ദേഹത്തിന്റെ മനോഭാവവുമാണ് കലാമിന്റെ ജന്മദിനം ലോക വിദ്യാർത്ഥിദിനമായി തിരഞ്ഞെടുക്കാൻ കാരണമായത്.

ഇന്ത്യയിലും വിദേശത്തുമായി 48 സർവകലാശാലകളിൽ നിന്നും ഓണററി ഡോക്ടറേറ്റുകൾ ലഭിച്ചിട്ടുള്ളയാളാണ് കലാം. ബഹുമാനപ്പെട്ട സിവിലിയൻ പുരസ്‌കാരങ്ങളും അദ്ദേഹം നേടിയിട്ടുണ്ട്. 1981ൽ പത്മഭൂഷണും 1990ൽ പത്മവിഭൂഷണും 1997ൽ ഭാരതരത്‌നയും അദ്ദേഹത്തെ തേടിയെത്തി. പ്രധാനമന്ത്രിയുടെ മുഖ്യ ശാസ്ത്ര ഉപദേഷ്ടാവായി ഏഴ് വർഷവും ഡിആർഡിഒയുടെ സെക്രട്ടറിയായും കലാം സേവനമനുഷ്ഠിച്ചിട്ടുണ്ട്.

വിദ്യാഭ്യാസത്തിന്റെ പ്രസക്തിയെയും വിദ്യാർത്ഥി സ്വപ്‌നങ്ങളെയും കുറിച്ച് കലാമിന്റെ ചില ഉദ്ധരണികളിതാ..

• അറിവ്, കഠിനാധ്വാനം, സ്ഥിരോത്സാഹം എന്നിവയോടൊപ്പം വലിയൊരു ലക്ഷ്യമുണ്ടെങ്കിൽ ജീവിതത്തിൽ എന്തും നിങ്ങൾക്ക് നേടിയെടുക്കാം..
• രാജ്യം അഴിമതി രഹിതമാകണമെങ്കിൽ സമൂഹത്തിലെ മൂന്ന് വ്യക്തികൾക്കാണ് അതിലേക്ക് നമ്മെ നയിക്കാൻ കഴിയുക. അച്ഛൻ, അമ്മ, അദ്ധ്യാപകൻ എന്നിവരാണവർ..
• ഒരാളുടെ ഭാവി, കഴിവുകൾ, വ്യക്തിത്വം എന്നിവ വാർത്തെടുക്കുന്നതിൽ മുഖ്യപങ്കു വഹിക്കുന്ന അതിശ്രേഷ്ഠമായ തൊഴിലാണ് അദ്ധ്യാപനം..
• ആകാശം നോക്കൂ.. നാം ഒറ്റക്കല്ലെന്ന് നമുക്ക് തോന്നും.. സ്വപ്‌നം കാണുന്നവർക്കും അതിനായി പ്രയത്‌നിക്കുന്നവർക്കും വേണ്ടി ഈ ഭൂലോകം മുഴുവൻ നമ്മോട് കൂടെയുണ്ടാകും.