ന്യൂയോർക്ക്: ആർഎസ്എസ് സർസംഘചാലക് മോഹൻ ഭഗവത് ന്യൂയോർക്ക് നഗരത്തിലെ സ്വാമി പ്രഭുപാദർ സ്ഥാപിച്ച ആദ്യ ഇസ്കോൺ ക്ഷേത്രം സന്ദർശിച്ചു. ഇസ്കോണിന്റെ 60ാം വാർഷികാഘോഷങ്ങളുടെ ഭാഗമായി നടന്ന ചടങ്ങുകളിലാണ് മോഹൻ ഭഗവത് പങ്കെടുത്തത്.
ന്യൂയോർക്ക് നഗരത്തിലെ 26, 2nd അവന്യൂവിലാണ് ചരിത്രപ്രാധാന്യമുള്ള ഇസ്കോൺ ക്ഷേത്രം സ്ഥിതി ചെയ്യുന്നത്. 1966 ജൂലൈ 13നാണ് സ്വാമി പ്രഭുപാദർ ഇവിടെ ആദ്യ ഇസ്കോൺ ക്ഷേത്രം സ്ഥാപിച്ചത്. ക്ഷേത്രസ്ഥാപനത്തിന്റെ ആറുപതിറ്റാണ്ട് പൂർത്തിയാകുന്നതിന്റെ ഭാഗമായി വിപുലമായ ആഘോഷങ്ങളാണ് ഇവിടെ സംഘടിപ്പിച്ചത്.
സന്ദർശനത്തിന്റെ ഭാഗമായി ന്യൂയോർക്ക് നഗരത്തിലെ ഭവനരഹിതരായ ആളുകൾക്ക് ഭക്ഷണം വിതരണം ചെയ്യുന്ന സംരംഭത്തിലും മോഹൻ ഭഗവത് പങ്കെടുത്തു. സാമൂഹിക സേവനവും ആത്മീയ ബോധവും ഒരുമിച്ച് മുന്നോട്ടുകൊണ്ടുപോകേണ്ടതിന്റെ സന്ദേശം കൂടിയാണ് പരിപാടിയിലൂടെ ഉയർന്നത്.
ലോകത്ത് നിലനിൽക്കുന്ന സംഘർഷങ്ങളെയും വൈവിധ്യങ്ങളെയും പരാമർശിച്ചുകൊണ്ടായിരുന്നു മോഹൻ ഭഗവതിന്റെ സന്ദേശം. നിരവധി സംഘർഷങ്ങളും ദ്വന്ദ്വങ്ങളും നിലനിൽക്കുന്ന ഇന്നത്തെ ലോകത്ത് മനുഷ്യരെ ഒന്നിപ്പിക്കാൻ കഴിയുന്ന ഏക ഘടകം ബോധമാണെന്ന് അദ്ദേഹം പറഞ്ഞു. ആ ബോധം കൃഷ്ണബോധമാണെന്നും നമ്മൾ ഒന്നാണെന്ന തിരിച്ചറിവാണ് അതിലൂടെ ലഭിക്കുന്നതെന്നും അദ്ദേഹം വ്യക്തമാക്കി.
വൈവിധ്യങ്ങളും ദ്വന്ദ്വങ്ങളും സംഘർഷങ്ങളും ഏറെയുണ്ടെങ്കിലും യഥാർഥത്തിൽ എല്ലാം കൃഷ്ണനാണെന്ന തിരിച്ചറിവ് മനുഷ്യരുടെ ഹൃദയങ്ങളിൽ എത്തിച്ചേരുകയാണെങ്കിൽ ലോകം കൂടുതൽ മികച്ചതാകുമെന്നും മോഹൻ ഭഗവത് പറഞ്ഞു.
ഓരോ മനുഷ്യനും സ്വർഗീയമായ വാസസ്ഥലം പോലെ അനുഭവപ്പെടുന്ന ഒരു ലോകമാണ് ആ തിരിച്ചറിവിലൂടെ സൃഷ്ടിക്കപ്പെടുകയെന്നും അദ്ദേഹം അഭിപ്രായപ്പെട്ടു. ആത്മീയബോധത്തിലൂടെ മനുഷ്യർക്കിടയിലെ ഭിന്നതകൾ മറികടന്ന് ഐക്യത്തിലേക്ക് എത്തണമെന്ന സന്ദേശമാണ് ന്യൂയോർക്കിലെ ഇസ്കോൺ ക്ഷേത്രത്തിലെ സന്ദർശനത്തിലൂടെ മോഹൻ ഭഗവത് മുന്നോട്ടുവച്ചത്.
