മുംബൈ: ലഹരിമരുന്ന് കേസിൽ അറസ്റ്റിലായ ആര്യൻ ഖാന് കഞ്ചാവ് എത്തിച്ച് നൽകാമെന്ന് അനന്യ പാണ്ഡെ സന്ദേശം അയച്ചതായി നർകോട്ടിക് കൺട്രോൾ ബ്യൂറോ. അനന്യയും ആര്യനും തമ്മിലുള്ള വാട്സ്ആപ്പ് ചാറ്റുകൾ സംബന്ധിച്ചുള്ള ചോദ്യം ചെയ്യലിലാണ് ഇത്തരമൊരു സന്ദേശം അയച്ചതായി അനന്യ വ്യക്തമാക്കിയത്. ഈ വാട്സ്ആപ്പ് ചാറ്റുമായി ബന്ധപ്പെട്ടാണ് അനന്യയേയും ചോദ്യം ചെയ്യാനായി വിളിച്ച് വരുത്തിയത്. വാട്സ്ആപ്പിൽ ചാറ്റിൽ ഇരുവരും കഞ്ചാവിനെ കുറിച്ച് സംസാരിക്കുന്നുണ്ട്. ഇതിനിടെ ഈ ആഴ്ച അൽപ്പം കഞ്ചാവ് സംഘടിപ്പിച്ച് തരാമോ എന്ന് ആര്യൻ അനന്യയോട് ചോദിക്കുന്നുണ്ട്. താൻ ശരിയാക്കി തരാം എന്നാണ് അനന്യ ഇതിന് മറുപടിയായി പറയുന്നത്. ചോദ്യം ചെയ്യലിൽ ഇങ്ങനെ ഒരു സന്ദേശം അയച്ചുവെന്നും അനന്യ സമ്മതിച്ചിട്ടുണ്ട്. എന്നാൽ അത് കാര്യമായിട്ടല്ലെന്നും, തമാശയ്ക്ക് പറഞ്ഞതാണെന്നുമാണ് അനന്യയുടെ വാദം.
ഇന്നലെ മുംബൈയിലെ അനന്യ പാണ്ഡെയുടെ വീട്ടില് എന്സിബി റെയ്ഡ് നടത്തിയിരുന്നു. ഇതിന് ശേഷം ചോദ്യം ചെയ്യലിന് ഹാജരാകാന് അനന്യക്ക് ഉദ്യോഗസ്ഥര് നിര്ദ്ദേശം നല്കിയിരുന്നു. രണ്ട് മണിക്കൂറോളമാണ് ഇവരെ ഇന്നലെ ചോദ്യം ചെയ്തത്. അതേ സമയം ഇരുവരും തമ്മില് ഈ വിഷയത്തില് ധാരാളം സംസാരം നടന്നിട്ടുണ്ടെങ്കിലും, അനന്യ ആര്യന് ഖാന് കഞ്ചാവ് എത്തിച്ചു നല്കി എന്നതിന് കൃത്യമായ തെളിവുകള് ലഭിച്ചിട്ടില്ലെന്നും എന്സിബി വ്യക്തമാക്കുന്നു. ധീരുഭായ് അംബാനി ഇന്റര്നാഷണല് സ്കൂളില് ആര്യന്റെ സഹപാഠിയായിരുന്നു അനന്യ. ആര്യന്റെ സഹോദരി സുഹാന അടുത്ത ചങ്ങാതിയാണെന്നും, എല്ലാവരും കുടുംബസുഹൃത്തുക്കളാണെന്നും അനന്യ എന്സിബി ഉദ്യോഗസ്ഥരോട് പറഞ്ഞു.
ലഹരിമരുന്നുകൾ ഇതുവരെ ഉപയോഗിച്ചിട്ടില്ലെന്നും, ആർക്കും വിതരണം ചെയ്തിട്ടില്ലെന്നും അനന്യ പാണ്ഡെ ചോദ്യം ചെയ്യലിൽ പറഞ്ഞു. ആര്യൻ ഖാനുമായി നടന്ന വാട്സ്ആപ്പ് ചാറ്റുകൾ വളരെ പഴയതാണ്. ലഹരി എന്ന് ഉദ്ദേശിച്ചത് സിഗരറ്റിനെ ആണെന്നും കഞ്ചാവിനെ കുറിച്ച് അല്ലെന്നുമാണ് അനന്യയുടെ വാദം.
