ചണ്ഡീഗഡ്: പോലീസുകാരുടെ അശ്രദ്ധമൂലം രണ്ട് പ്രതികൾ ചാടിപ്പോയ സംഭവത്തിൽ ആറ് പോലീസുകാർ പിടിയിൽ. പഞ്ചാബിലെ മുഖേറിയൻ കോടതിയിൽ നിന്നും ഫരീദ്കോട്ട് സെൻട്രൽ ജയിലിലേയ്ക്ക് കൊണ്ടുവരും വഴിയാണ് പ്രതികൾ ചാടിപ്പോയത്.
അസിസ്റ്റന്റ് സബ് ഇൻസ്പെക്ടർ(എഎസ്ഐ) ഗുർദേവ് സിംഗ്, എഎസ്ഐ ബൽജീന്ദർ സിംഗ്, എഎസ്ഐ കുൽവീന്ദർ സിംഗ്, ഹെഡ് കോൺസ്റ്റബിൾ സുരീന്ദർ കുമാർ, പഞ്ചാബ് ഹോം ഗാർഡ് (പിഎച്ച്ജി) മഹീന്ദർ സിംഗ്, പിഎച്ച്ജി ഹർമിന്ദർ സിംഗ് എന്നിവരെയാണ് അറസ്റ്റ് ചെയ്തത്. അബ്ദുൾ, സാജിം എന്നീ പ്രതികളാണ് പോലീസിന്റെ അശ്രദ്ധ മൂലം പിടിയിൽ നിന്നും രക്ഷപ്പെട്ടത്. മോഷണ കേസിലെ പ്രതികളാണിവർ.
വിലങ്ങുകൾ ഊരിമാറ്റിയ ശേഷമാണ് പ്രതികൾ രക്ഷപ്പെട്ടത്. അറസ്റ്റിലായ പോലീസുകാർക്ക് ഇതിൽ പങ്കുണ്ടോയെന്നാണ് ഉന്നത ഉദ്യോഗസ്ഥർ അന്വേഷിക്കുന്നത്. ഇവർക്കെതിരെ വിവിധ വകുപ്പുകൾ ചുമത്തി കേസ് ചാർജ് ചെയ്തിട്ടുണ്ടെന്ന് അധികൃതർ അറിയിച്ചു.
Comments