കൊച്ചി: സംസ്ഥാനത്ത് തീയേറ്ററുകൾ തുറന്ന സാഹചര്യത്തിൽ ആരാധകരും തീയേറ്റർ ഉടമകളും ആകാംക്ഷയോടെ കാത്തിരിക്കുന്ന ചിത്രമാണ് മരക്കാർ അറബിക്കടലിന്റെ സിംഹം. ചിത്രം ഒടിടിയിലൂടെ റിലീസ് ചെയ്യാൻ ആലോചിക്കുന്നതായി ആന്റണി പെരുമ്പാവൂർ നേരത്തെ അറിയിച്ചിരുന്നു. ഇത് തീയേറ്റർ ഉടമകളെ ആശങ്കയിലാക്കിയിരുന്നു. ഇപ്പോഴിതാ മരക്കാർ തീയേറ്റർ റിലീസ് ചെയ്യുന്നതിന് നിബന്ധനകളുമായി എത്തിയിരിക്കുകയാണ് നിർമ്മാതാവ് ആന്റണി പെരുമ്പാവൂർ.
തന്റെ ആവശ്യങ്ങൾ അംഗീകരിക്കുന്ന പക്ഷം ഒടിടി റിലീസ് മാറ്റുന്നതിനെക്കുറിച്ച് ആലോചിക്കാമെന്നും ആന്റണി പെരുമ്പാവൂർ ഫിലിം ചേംബറിനെ അറിയിച്ചു. തനിക്ക് തീയേറ്ററുകളിൽ നിന്നും 50 കോടി രൂപ വേണം. അതോടൊപ്പം സിനിമ തീയേറ്ററുകളിൽ 25 ദിവസമെങ്കിലും പ്രദർശിപ്പിക്കുമെന്ന മിനിമം ഗ്യാരന്റി നൽകണം. ഒരോ തീയേറ്ററിൽ നിന്നും 25 ലക്ഷം നൽകണം. നഷ്ടം വന്നാൽ ആ പണം തിരികെ നൽകില്ല. ലാഭം വന്നാൽ ലാഭ വിഹിതം നൽകണം എന്നിങ്ങനെയാണ് ആന്റണി പെരുമ്പാവൂരിന്റെ ആവശ്യങ്ങൾ.
ആന്റണി പെരുമ്പാവൂരിന്റെ ആവശ്യങ്ങൾ ഫിലിം ചേംബർ തീയേറ്റർ ഉടമകളെ അറിയിച്ചിട്ടുണ്ട്. എന്നാൽ ഈ പ്രതിസന്ധി ഘട്ടത്തിൽ ഇത്രയധികം പണം നൽകാൻ സാധിക്കില്ലെന്നാണ് പല തീയേറ്റർ ഉടമകളും അറിയിച്ചിരിക്കുന്നത്. ഈ സാഹചര്യത്തിൽ തീയേറ്റർ ഉടമകളുടെ അടിയന്തര യോഗം നാളെ ചേരും.
ചിത്രം തീയേറ്ററിൽ തന്നെ റിലീസ് ചെയ്യണമെന്ന് ആവശ്യപ്പെട്ട് കല്യാണി പ്രിയദർശനും എത്തിയിരുന്നു. ആന്റണി പെരുമ്പാവൂർ ദേശീയ അവാർഡിന്റെ സന്തോഷം അറിയിച്ച പോസ്റ്റ് പങ്കുവെച്ചായിരുന്നു കല്യാണിയുടെ പോസ്റ്റ്. എല്ലാവരും ആഗ്രഹിക്കുന്നത് പോലെ തീയേറ്ററിൽ തന്നെ റിലീസ് ചെയ്യൂ എന്നാണ് കല്യാണി പ്രിയദർശൻ ട്വിറ്ററിൽ കുറിച്ചത്.
Comments