തിരുവനന്തപുരം: സംസ്ഥാനത്ത് വർദ്ധിച്ചു വരുന്ന വ്യാജ ഡീസൽ ഉപയോഗം തടയാൻ പരിശോധന കർശനമാക്കുമെന്ന് ഗതാഗത മന്ത്രി ആന്റണി രാജു. അതേസമയം വ്യാജ ഡീസൽ ഉപയോഗിക്കുന്ന പ്രദേശങ്ങൾ മോട്ടോർ വാഹന വകുപ്പിന്റെ നീരീക്ഷണത്തിലാണെന്ന് ട്രാൻസ്പോർട്ട് കമ്മീഷണർ അറിയിച്ചു.
വ്യവസായ ആവശ്യങ്ങൾക്ക് മാത്രം ഉപയോഗിക്കേണ്ട പ്രത്യേക തരം ഡീസൽ, വാഹനങ്ങളിൽ ഉപയോഗിച്ചാൽ ഉണ്ടാകുന്ന തീപിടിത്ത സാധ്യതയും അന്തരീക്ഷ മലിനീകരണവും കണക്കിലെടുത്താണ് ഈ നടപടിയെന്ന് മന്ത്രി അറിയിച്ചു. ഇന്ധന വിലയിലെ ചെറിയ ലാഭം മുന്നിൽ കണ്ട് വാഹന ഉടമകളുടെ ഈ പ്രവൃത്തി യാത്രക്കാരുടെ ജീവൻ അപകടത്തിലാക്കാൻ സാധ്യതയുണ്ട്. ഇതിന് അനുവദിക്കില്ലെന്നും മന്ത്രി പറഞ്ഞു.
വ്യാജ ഇന്ധനം ഉപയോഗിക്കുന്ന സ്വകാര്യ വാഹനങ്ങളെ നിരീക്ഷിച്ച് അവയുടെ രജിസ്ട്രേഷനും പെർമിറ്റും റദ്ദാക്കുമെന്നും ഉടമകൾക്കെതിരെ കർശന നടപടി സ്വീകരിക്കാനും ട്രാൻസ്പോർട്ട് കമ്മീഷണർക്ക് മന്ത്രി നിർദ്ദേശം നൽകിയിട്ടുണ്ട്.
Comments