നിങ്ങൾക്ക് പ്രേതത്തെ പേടിയുണ്ടോ? ഇവിടെ വന്ന് ധൈര്യം പരീക്ഷിക്കാം; വീഡിയോ

കുട്ടിക്കാലത്ത് പ്രേതസിനിമകളും കഥകളുമെല്ലാം വായിച്ച് ഉറക്കം കളഞ്ഞിട്ടുള്ളവരാണ് നമ്മളിൽ ഭൂരിഭാഗം പേരും.കൂട്ടുകാരോട് പന്തയം വെച്ച് ഇരുട്ടു മുറികളിൽ ഇരുന്ന് ധൈര്യം തെളിയിക്കാൻ ശ്രമിച്ചവർ.ഇരുട്ടും പ്രേതവും, അസ്ഥികൂടങ്ങളും എല്ലാം ഇന്നും മനുഷ്യനെ ഭയപ്പെടുത്തുന്നു. പേടിയുണ്ടെങ്കിലും മനുഷ്യന് എല്ലായ്പ്പോഴും അവയോട് കൗതുകവും തോന്നാറുണ്ട്.

ഇപ്പോഴും ധൈര്യം പരീക്ഷിക്കാൻ നിങ്ങൾക്ക് താൽപര്യമുണ്ടോ …. എന്നാൽ ടിക്കെറ്റെടുത്ത് കയറിക്കോളൂ എന്നാണ് അമേരിക്കിയിലെ ഒരു മ്യൂസിയത്തിലെ നടത്തിപ്പുകാർ  അവിടെ എത്തുന്ന സന്ദർശകരോട് പറയുന്നത്. അത്യധികം ഭയാനകവും മുട്ടിടിപ്പിക്കുന്നതുമായ നിരവധി വിചിത്ര ശേഖരങ്ങളുടെ കലവറ മ്യൂസിയത്തിലുള്ളതാണ് ഇതിന് കാരണം. ഏതാണീ ഭയങ്കര മ്യൂസിയം എന്നല്ലേ…..

അമേരിക്കയിലെ സാവന്നയിൽ സ്ഥിതി ചെയ്യുന്ന മ്യൂസിയം ഓഫ് മോർബിട് ആണ് പേടിപ്പെടുത്തുന്ന ഈ  മ്യൂസിയം. സീരിയൽ കില്ലർമാർക്കു വേണ്ടി സമർപ്പിച്ചിരിക്കുന്ന ഈ മ്യൂസിയത്തിൽ അസ്ഥികൂടങ്ങൾ,സീരിയൽ കൊലപാതികളുടെ വസ്ത്രങ്ങൾ വിചിത്രമുഖംമൂടികൾ, എല്ലുകൾ,തലയോട്ടികൾ എന്ന് വേണ്ട സാധാരണ മനുഷ്യന്റെ ഉള്ളിൽ ഉൾക്കിടിലമുണ്ടാക്കുന്ന നിരവധി വസ്തുക്കൾ വളരെ വിചിത്രമായി ഇവിടെ സ്ഥാപിച്ചിരിക്കുന്നു. മ്യൂസിയത്തിലേക്കുള്ള പ്രവേശനം തന്നെ അത്യധികം നിഗൂഢത നിറഞ്ഞതാണ്.  കാലെടുത്ത് വെയ്‌ക്കുന്നതിന് മുമ്പ് റിസ്‌ക് എടുക്കണോ വേണ്ടയോ എന്ന് ഒരു നിമിഷം ചിന്തിച്ചു പോവുന്ന വഴി…

റയാൻ ഗ്രേവ് ഫേസ് എന്നയാളാണ് ഈ മ്യൂസിയത്തിന് പിറകിലെ ബുദ്ധികേന്ദ്രം. 5000 ചതുശ്ര അടിയിൽ രണ്ട് ലക്ഷം ഡോളർ ചെലവഴിച്ച് പണിത ഈ മ്യൂസിയം കൊറോണ കാലത്തിന് തൊട്ടുമുൻപ് 2020 ലെ വാലന്റെൻസ് ദിനത്തിലാണ് പ്രവർത്തനം ആരംഭിച്ചത്. കുട്ടിക്കാലത്ത്  പ്രേതങ്ങളോടും പേടിപ്പെടുത്തുന്ന വസ്തുക്കളോടും തോന്നിയ കൗതുകമാണ് റയാൻ ഗ്രേവ് ഫേസിനെ ഇങ്ങനെ ഒരു മ്യൂസിയം നിർമ്മിക്കാൻ പ്രേരിപ്പിച്ചത്.

യുഎസ് സ്റ്റേറ്റ് ജോർജിയയിലെ ഏറ്റവും പഴക്കം ചെന്ന നഗരമാണ് സാവന്ന.യുഎസിന്റെ ചരിത്രത്തിൽ ഏറ്റവും ആധികാരികമായ പുരാതന നഗരം. ഹോസ്റ്റസ് സിറ്റി ഓഫ് സൗത്ത് എന്ന് അറിയപ്പെടുന്ന  ഈ നഗരത്തിലെ പ്രധാന ആകർഷണമായി മാറിയിരിക്കുകയാണ്  റയാൻ ഗ്രേവ് ഫേസിന്റെ മ്യൂസിയം ഓഫ് ദി മോർബിട്.

കോവിഡ് മഹാമാരിക്കിടയിലും നിരവധി പേരാണ് ഇവിടെ ധൈര്യം പരീക്ഷിക്കാനെത്തുന്നത്. സിനിമകളിലൂടെയും കഥകളിലൂടെയും കണ്ടും കേട്ടും അറിഞ്ഞ സീരിയൽ കില്ലറുകളുടെ വസ്ത്രങ്ങളും മറ്റ് ഉപകരങ്ങളും അടുത്ത് കാണാനായതിന്റെ നിർവൃതിയിലാണ് പലരും മ്യൂസിയം സന്ദർശിച്ച് മടങ്ങുന്നത്.