സ്ത്രീസമത്വത്തിന് കൂടുതൽ പ്രാധാന്യം നൽകണമെന്ന് വാതോരാതെ സംസാരിക്കാൻ അറിയാമെങ്കിലും അത് നിറവേറ്റാൻ എല്ലാവരും അല്പം മടികാണിക്കാറുണ്ട്. അവൾ ഒരു പെണ്ണല്ലേ? അവൾക്കത് ചെയ്യാൻ സാധിക്കുമോ? അവളെക്കൊണ്ടൊന്നും പറ്റില്ല എന്ന ചിന്തകളാണ് സ്ത്രീകളെ മുൻപന്തിയിൽ നിന്നും മാറ്റി നിർത്തുന്നത്. പ്രത്യേകിച്ചും അധികാര രാഷ്‌ട്രീയത്തിൽ സ്ത്രീ സമൂഹത്തിന്റെ പങ്കാളിത്തം വളരെ ശുഷ്‌കം തന്നെയാണ്. എന്നാൽ ഇതിനെ പൊളിച്ചെഴുതുന്ന ഒരു പ്രദേശമുണ്ട്. വനിതകൾ മാത്രം ഭരണം കയ്യാളുന്ന ഈ പ്രദേശം അങ്ങ് യൂറോപ്പിലെ എസ്റ്റോണിയയിലാണ്.
ശക്തരായ സ്ത്രീകൾ ഭരിക്കുന്ന ലോകത്തെ ഏക ദ്വീപായ കിഹ്നു ദ്വീപിനെക്കുറിച്ചാണ് പറഞ്ഞുവരുന്നത്. ഇവിടെ ഭരണവും തീരുമാനങ്ങളുമെല്ലാം സ്ത്രീകളുടെ കെയ്യിൽ ഭദ്രമാണ്.യൂറോപ്യൻ രാജ്യമായ എസ്റ്റോണിയയിലാണ് കിഹ്നു ദ്വീപ് സ്ഥിതി ചെയ്യുന്നത്. പ്രകൃതി സുന്ദരമായ കിഹ്നു ദ്വീപ് ഇന്ന് വൈവിധ്യം കൊണ്ടും കലാരീതികൾ കൊണ്ടും ആളുകളെ ഞെട്ടിക്കുകയാണ്.
പതിറ്റാണ്ടുകൾ നീണ്ട പാരമ്പര്യവും സംസ്‌കാരവുമാണ് ഈ കൊച്ചു ദ്വീപിനുള്ളത്. കടലിൽ ഉപജീവനമാർഗം തേടുന്നവരാണ് ദ്വീപിലെ പുരുഷന്മാർ. അതിനായി മാസങ്ങളോളം ഇവർ കടലിൽ കഴിയും. ഈ സമയം ദ്വീപിൽ ഭരണം നടത്തുക സ്ത്രീകളാണ്. വിവാഹം ശവസംസ്‌കാരം ഉൾപ്പെടെയുള്ള ചടങ്ങുകൾ മുന്നിൽ നിന്ന് നടത്തുന്നത് സ്ത്രീകളാണ്. പരമ്പരാഗതമായ കലാരീതികൾ കൊണ്ട് യുനെസ്‌കോയുടെ സാംസ്‌കാരിക പൈതൃക പട്ടികയിലും കിഹ്നു ദ്വീപ് സ്ഥാനം പിടിച്ചിട്ടുണ്ട്.
ഏഴ് ഗ്രാമങ്ങളും ബീച്ചുകളുമുൾപ്പെടുന്ന ഈ ദ്വീപിൽ 300 കുടുംബങ്ങളാണ് താമസിക്കുന്നത്. ഇതിൽ കൂടുതലും സ്ത്രീകൾ തന്നെയാണ് ഉള്ളത്. പാട്ട്, നൃത്തം കരകൗശല വിദ്യകൾ ഉൾപ്പെടെയുള്ള പരമ്പരാഗത ശീലങ്ങൾക്ക് കോട്ടം തട്ടാതെ കൊണ്ടുപോകുകയും കല്യാണം ശവസംസ്‌കാരം തുടങ്ങിയ ചടങ്ങുകളുടെ ചുമതല ഏറ്റെടുക്കുകയും ചെയ്യുന്ന സ്ത്രീകളെ പുരാതന സംസ്‌കാരത്തിന്റെ സംരക്ഷകരായാണ് കണക്കാക്കുന്നത്.
ഇവിടുത്തെ കാലാരൂപങ്ങളും കരകൗശല നിർമ്മാണവുമെല്ലാം വ്യത്യസ്തമാണ്. പരമ്പരാഗത രീതിയിലുള്ള വസ്ത്രങ്ങളാണ് അവിടുത്തുകാർ ഉപയോഗിക്കുന്നത്. ഇവിടുത്തുകാരുടെ വസ്ത്രധാരണ രീതി മറ്റ് പല രാജ്യങ്ങളിലും പ്രസിദ്ധമാണ്. ദ്വീപ് സംസ്‌കാരത്തിന്റെ പ്രധാന ഭാഗങ്ങളിൽ ഒന്നാണ് സംഗീതം. ഇവിടുത്തെ ആഘോഷങ്ങളിലും ഉത്സവങ്ങളിലും എന്തിനധികം പറയണം പാഠ്യവിഷയങ്ങളിൽ പോലും നൃത്തവും സംഗീതവും ഉൾപ്പെടുത്തിയിട്ടുണ്ട്.
എന്നാൽ എല്ലാ സ്ഥലങ്ങളെയുപോലെ പോലെ ഈ ദ്വീപിനും നിഗൂഢമായ ഒരു ചരിത്രമുണ്ട്. ആദ്യ കാലങ്ങളിൽ കിഹ്നു ദ്വീപിൽ കുറ്റവാളികളും നാട് കടത്തപ്പെട്ടവരും മാത്രമാണ് ഉണ്ടായിരുന്നത്. ഇവിടെ കുറ്റകൃത്യങ്ങൾ വർദ്ധിക്കുകയും സമാധാനാന്തരീക്ഷം ഇല്ലാതാകുകയും ചെയ്തതോടെ സ്ത്രീകൾ ഭരണം ഏറ്റെടുത്തു. അടുത്ത തലമുറയ്‌ക്ക് പാരമ്പര്യങ്ങൾ കൈമാറാൻ സാധിച്ചത് ദ്വീപിനെ ഇന്നും സാംസ്‌കാരിക കേന്ദ്രമായി നിലനിർത്തുകയാണ്. ദ്വീപിനെ മാറ്റത്തിലേക്ക് നയിച്ചതിൽ സ്ത്രീകളുടെ പങ്ക് വളരെ വലുതാണ്.
വിനോദസഞ്ചാര രംഗത്തും കിഹ്നു ദ്വീപ് മുൻപന്തിയിലാണ്. വിനോദ സഞ്ചാര സീസണുകളിൽ പ്രകൃതി ഭംഗി ആസ്വദിക്കാൻ നിരവധി സഞ്ചാരികൾ ദ്വീപ് തേടി എത്താറുണ്ട്. ദ്വീപിനെ അടുത്തറിയാനും അവരുടെ പാരമ്പര്യവും സംസ്‌കാരവും കണ്ടറിയാനും അതിനെ കുറിച്ച് കൂടുതൽ പഠിക്കാനും വിനോദ സഞ്ചാരികൾക്കും ഇവിടെ അവസരം ഒരുക്കിയിട്ടുണ്ട്.
