കൊച്ചി :മാരകമയക്കുമരുന്നായ എംഡിഎംഎയുമായി യുവാവ് പിടിയിൽ. അന്തർ സംസ്ഥാന ടൂറിസ്റ്റ് ബസിൽ എംഡിഎംഎ കടത്താൻ ശ്രമിക്കുന്നതിനിടെയാണ് യുവാവ് നാർക്കോട്ടിക്ക് സംഘത്തിന്റെ വലയിലാകുന്നത്. പെരുമ്പാവൂർ മഞ്ഞപ്പെട്ടി കുതിരപ്പറമ്പ് ഏറാടിമുച്ചേടത്ത് വീട്ടിൽ സുധീറാണ്(24) പിടിയിലായത്.
ജില്ല റൂറൽ എസ്പി കെ കാർത്തിക്കിന് രഹസ്യ വിവരം ലഭിച്ചതിനെ തുടർന്ന് കഴിഞ്ഞ ദിവസം പുലർച്ചെ റൂറൽ ജില്ല ആന്റി നാർക്കോട്ടിക് പ്രത്യേക അന്വേഷണ വിഭാഗവും അങ്കമാലി പോലീസും ചേർന്ന് യുവാവിനെ പിടികൂടുകയായിരുന്നു. ദേശീയപാതയിൽ അങ്കമാലി കെഎസ്ആർടിസി ബസ് സ്റ്റാൻഡിന് സമീപം ബസ് തടഞ്ഞാണ് യുവാവിനെ പിടികൂടിയത്.
ബസ് തടഞ്ഞു നിർത്തി നടത്തിയ പരിശോധനയിലാണ് ഹെൽമെറ്റിൽ പൊതിഞ്ഞ് രഹസ്യമായി സൂക്ഷിച്ചിരുന്ന 50 ഗ്രാം എംഡിഎംഎ അന്വേഷണ സംഘം കണ്ടെത്തിയത്. ആർക്കും സംശയം തോന്നാതിരിക്കാൻ ഹെൽമെറ്റ് തോൾ ബാഗിൽ പൊതിഞ്ഞ് സൂക്ഷിച്ചിരിക്കുകയായിരുന്നു.പ്രതിയെ ചോദ്യം ചെയ്തതിൽ നിന്ന് സി.ജെ എന്ന് വിളിക്കുന്ന സുഡാൻ വംശജൻ ബൈക്കിൽ ഹെന്നൂർ എന്ന സ്ഥലത്തെത്തിയാണ് മയക്കുമരുന്ന് കൈമാറിയതെന്നാണ് വെളിപ്പെടുത്തൽ.
