ന്യൂഡൽഹി; ഇന്ത്യയിലെ ഏറ്റവും വലിയ സൗരോർജ കരാർ സ്വന്തമാക്കി ടാറ്റ ഗ്രൂപ്പ്. 945 കോടി പദ്ധതി ചെലവുള്ള ഇന്ത്യയിലെ ഏറ്റവും വലിയ സോളാർ, ബാറ്ററി സംഭരണ പദ്ധതിയാണ് ടാറ്റയുടെ പവർ സോളാർ സിസ്റ്റം ലിമിറ്റഡ് സ്വന്തമാക്കിയിരിക്കുന്നത്. ഇത് സംബന്ധിച്ച് ഔദ്യോഗികമായ ഉത്തരവ് സോളാർ എനർജി കോർപ്പറേഷൻ ഓഫ് ഇന്ത്യയിൽ നിന്ന് ടാറ്റയ്ക്ക് ലഭിച്ചു.
ടാറ്റ പവറിന്റെ പൂർണ ഉടമസ്ഥതയിലുള്ള ഉപസ്ഥാപനമാണ് ടാറ്റ പവർ സോളാർ സിസ്റ്റം ലിമിറ്റഡ്. കമ്പനിക്ക് 100 മെഗാവാട്ട് സൗരോർജ്ജ പദ്ധതിയോടൊപ്പം 120 മെഗാവാട്ട് യൂട്ടിലിറ്റി സ്കെയിൽ ബാറ്ററി എനർജി സ്റ്റോറേജ് സിസ്റ്റവുമാണ് കരാർ പ്രകാരം തയ്യാറായിരിക്കുന്നത്. 18 മാസങ്ങൾക്കുള്ളിൽ പൂർത്തിയാക്കുന്ന 945 കോടി രൂപയുടെ പദ്ധതി ഛത്തീസ്ഗഡിലാണ് സജ്ജമാകുന്നത്.
ഇന്ത്യയിലെ ഏറ്റവും വലിയ യൂട്ടിലിറ്റി സ്കെയിൽ പ്രോജക്റ്റായ ബി.ഇ.എസ്.എസിനൊപ്പം സോളാർ കോർപ്പറേഷൻ ഓഫ് ഇന്ത്യയിൽ നിന്ന് അഭിമാനകരമായ ഓർഡർ ലഭിച്ചതിൽ അത്യധികം സന്തോഷമുണ്ടെന്ന് ടാറ്റ പവർ സിഇഒ പ്രവീർ സിൻഹ പ്രതികരിച്ചു. ഛത്തീസ്ഗഡിൽ സ്ഥിതി ചെയ്യുന്ന പ്രോജക്ട് സൈറ്റുകളിൽ പദ്ധതിയുടെ എൻജിനീയറിങ്, ഡിസൈനിങ്, വിതരണം, നിർമാണം, രൂപീകരണം, പരീക്ഷണ പ്രവർത്തനങ്ങൾ, കമ്മീഷൻ ചെയ്യൽ എന്നിവ ഉൾപ്പെടെ എല്ലാ പ്രവർത്തനങ്ങളും ഉൾക്കൊള്ളുന്നതായി ടാറ്റ പവർ അറിയിച്ചു.
