കോട്ടയം: വണ്ടിയുടെ ശബ്ദം കേട്ട് വിരണ്ടോടിയ ആന വീണത് കിണറ്റിൽ. കോട്ടയം പനച്ചിക്കാട് പെരിഞ്ചേരിക്കുന്ന് ഭാഗത്താണ് സംഭവം. തടിപിടിക്കാൻ എത്തിയ പാലാ സ്വദേശിയുടെ ഉടമസ്ഥതയിലുള്ള കല്യാണിയെന്ന പിടിയാനയാണ് ഇടഞ്ഞ് ഓടി കിണറ്റിൽ ചാടിയത്.
ആനയുടെ ഭാരം കൊണ്ട് കിണറിന്റെ ഭാഗങ്ങൾ ഇടിഞ്ഞിരുന്നെങ്കിൽ വലിയ അപകടം ഉണ്ടാകുമായിരുന്നു. എന്നാൽ, ഭാഗ്യമൊന്നുകൊണ്ട് മാത്രമാണ് ആന വലിയ പരിക്കേൽക്കാതെ രക്ഷപ്പെട്ടതെന്നാണ് നാട്ടുകാർ പറയുന്നത്. ഇടഞ്ഞോടിയ പിടിയാനയുടെ രണ്ട് കാലുകൾ കിണറ്റിൽ കുരുങ്ങി.
സംഭവത്തിൽ കല്യാണിയുടെ തുമ്പിക്കൈക്കും നാവിനും മുറിവേറ്റു. കൂടാതെ, ആനയെ തളയ്ക്കാൻ എത്തിയ ആൾക്കും വിരലിന് നേരിയ പരിക്കേറ്റു. മുക്കാൽ മണിക്കൂറോളം പണിപ്പെട്ട ശേഷമാണ് ആനയുടെ കുരുങ്ങിയ കാലുകൾ പുറത്തെടുക്കാൻ കഴിഞ്ഞത്.
