കോഴിക്കോട്: വാഹനമിടിച്ച് ഗുരുതരമായി പരുക്കേറ്റ ഗര്ഭിണിയായ തെരുവുപട്ടി മൂന്നുകുഞ്ഞുങ്ങള്ക്ക് ജന്മം നല്കിയശേഷം ജീവന് വെടിഞ്ഞു. കോഴിക്കോട് മുക്കം അങ്ങാടിയിലാണ് കണ്ടുനിന്നവര്ക്ക് നൊമ്പരമായ സംഭവം.
വാഹനാപകടത്തില് സാരമായി പരിക്കേറ്റ ഗര്ഭിണിയായ തെരുവ് പട്ടിക്ക് ആരോഗ്യ പ്രവര്ത്തകരും സന്നദ്ധ പ്രവര്ത്തകരും രക്ഷാപ്രവര്ത്തനം നടത്തി. എന്നാല് ആ ശ്രമങ്ങളൊക്കെ വിഫലമായി. എങ്കിലും മരണ വേദനക്കിടയിലും ആ അമ്മ മൂന്നു കുഞ്ഞുങ്ങള്ക്ക് ജന്മം നല്കിയാണ് ജീവന് വെടിഞ്ഞത്.
കണ്ടുനിന്നവരുടെ കണ്ണുനനയിക്കുന്നതായിരുന്നു ആ കാഴ്ച. വെള്ളിയാഴ്ച വൈകുന്നേരമാണ് ഗര്ഭിണിയായ പട്ടിക്ക് വാഹനാപകടത്തില് സാരമായി പരിക്കേറ്റത്. ശനിയാഴ്ച രാവിലെയോടെ പട്ടിയുടെ കരച്ചില് കേട്ട മുക്കം അഗ്രോ സര്വീസിലെ അരുണ് ലാലും ,പൊതു പ്രവര്ത്തകനായ പ്രഭാകരന് മുക്കവും പട്ടിക്ക് രക്ഷാപ്രവര്ത്തനം നടത്തുന്നതിനായി രംഗത്ത് എത്തി.
മരണവെപ്രാളത്തില് പട്ടി ഒരുകുഞ്ഞിന് ജന്മം നല്കിയിരുന്നു. പിന്നീട് ഇവരുടെ ശ്രമഫലമായി രണ്ടു കുഞ്ഞുങ്ങളെ കൂടി അമ്മയുടെ വയറ്റില് നിന്ന് പുറത്തെടുത്തു.തുടര്ന്ന് മുക്കം നഗരസഭ ചെയര്മാനെയും വെറ്റിറനറി ഡോക്ടറേയും വിവരമറിയിച്ചു. ഡോക്ടര് എത്തിയപ്പോഴേക്കും പട്ടി മരണത്തിന് കീഴടങ്ങിയിരുന്നു. തുടര്ന്ന് പട്ടിയേയും കുഞ്ഞുങ്ങളേയും ആശുപത്രിയിലേക്ക് മാറ്റി.
Comments