ഐഎസ്എല്ലിന്റെ എട്ടാം സീസണിലെ ആദ്യ വിജയം സ്വന്തമാക്കി കേരള ബ്ലാസ്റ്റേഴ്സ്. ഈ സീസണിൽ കളിച്ച എല്ലാ മത്സരവും വിജയിച്ച ഒഡീഷയെയാണ് കേരള ബ്ലാസ്റ്റേഴ്സ് പരാജയപ്പെടുത്തിയത്. ഒന്നിനെതിരെ രണ്ട് ഗോളിനായിരുന്നു കേരളബ്ലാസ്റ്റേഴ്സിന്റെ വിജയം. മലയാളി താരം പി. പ്രശാന്തും വാസ്ക്വേസും ബ്ലാസ്റ്റേഴ്സിനായി ഗോൾ നേടി.
ആദ്യ പകുതിയിൽ ഗോളടിക്കാതെ ഇരു ടീമുകളും സമനില പാലിച്ചു. രണ്ടാം പകുതിയിൽ ബ്ലാസ്റ്റേഴ്സ് ഒഡിഷയുടെ പിഴവുകൾ മുതലെടുത്ത് മികച്ച പ്രകടനം കാഴ്ച്ച വെയ്ക്കുകയായിരുന്നു. ഇതോടെ നാല് മത്സരങ്ങളിൽ അഞ്ച് പോയിന്റാണ് ബ്ലാസ്റ്റേഴ്സിനുള്ളത്. മൂന്ന് മത്സരങ്ങളിൽ ആറ് പോയിന്റുള്ള ഒഡീഷ മൂന്നാം സ്ഥാനത്താണ്.
നാല് മത്സരങ്ങളിലായി ഒരു ജയവും രണ്ട് സമനിലയും ഒരു തോൽവിയുമാണ് ബ്ലാസ്റ്റേഴ്സിനുള്ളത്. 12ന് ഈസ്റ്റ് ബംഗാളിനെതിരെയാണ് ബ്ലാസ്റ്റേഴ്സിന്റെ അടുത്ത മത്സരം.
