ന്യൂഡൽഹി: രാജ്യത്ത് അരാജകത്വം സൃഷ്ടിക്കാനും ഇന്ത്യയെ അസ്ഥിരപ്പെടുത്താനും ശ്രമങ്ങൾ നടക്കുന്നതായി ബിജെപി ദേശീയ അധ്യക്ഷൻ നിതിൻ നബീൻ. രാഹുൽ ഗാന്ധിയുടെ നേതൃത്വത്തിലുള്ള ഇൻഡി സഖ്യവും അരവിന്ദ് കെജ്‌രിവാളിന്റെ എഎപിയും സിജെപിയുമാണ് ഇത്തരം നീക്കങ്ങൾക്ക് പിന്നിൽ. ജനവിധി അംഗീകരിച്ച് അതിൽനിന്ന് പാഠം ഉൾക്കൊള്ളുന്നതിന് പകരം രാജ്യത്തെ അസ്ഥിരപ്പെടുത്താനുള്ള ശ്രമങ്ങളാണ് പ്രതിപക്ഷം നടത്തുന്നതെന്നും നിതിൻ നബീൻ ചൂണ്ടിക്കാട്ടി.
കഴിഞ്ഞ 12 വർഷമായി പ്രധാനമന്ത്രിയുടെ നേതൃത്വത്തിൽ ഭീകരവാദം തുടച്ചുനീക്കാനും രാജ്യത്തെ നക്‌സലിസത്തിൽ നിന്ന് മുക്തമാക്കാനും പ്രവർത്തിച്ചുവരികയാണ്. എന്നാൽ അർബൻ നക്‌സൽ മനോഭാവമുള്ള ചിലർ ഇപ്പോഴും രാജ്യത്തെ അസ്ഥിരപ്പെടുത്താൻ ശ്രമിക്കുകയാണ്. നിങ്ങളുടെ പദ്ധതികൾ ഒരിക്കലും വിജയിക്കില്ലെന്നും രാഹുലിന് നിതിൻ നബിൻ മുന്നറിയിപ്പ് നൽകി.
ഭരണഘടനാ സ്ഥാപനങ്ങളെ ചോദ്യം ചെയ്യാനും ജനാധിപത്യത്തെ ദുർബലപ്പെടുത്താനും രാജ്യത്തെ പരമോന്നത ഭരണഘടനാ പദവികൾ വഹിക്കുന്നവരെ അപമാനിക്കാനുമുള്ള ശ്രമങ്ങൾ അനുവദിക്കില്ല. ഇന്ത്യയെ അസ്ഥിരപ്പെടുത്താൻ വിദേശ ശക്തികളെ ആശ്രയിക്കുന്നവർ ഒരിക്കലും വിജയിക്കില്ല.
ഇന്ത്യയിലെ ജനങ്ങൾക്ക് ഇത്തരം നീക്കങ്ങളുടെ ലക്ഷ്യങ്ങൾ വ്യക്തമായി മനസ്സിലാകുന്നുണ്ടെന്ന് അദ്ദേഹം പറഞ്ഞു. രാഷ്‌ട്രീയ താൽപര്യങ്ങൾ മുൻനിർത്തി വിദേശശക്തികളുടെ നിർദേശപ്രകാരമാണ് പ്രതിപക്ഷം പ്രവർത്തിക്കുന്നത്. ഇന്ത്യൻ ജനാധിപത്യത്തിന് അപാരമായ കരുത്തുണ്ടെന്ന് വ്യക്തമാക്കിയ നിതിൻ നബീൻ, ഇത്തരം നീക്കങ്ങളെ പരാജയപ്പെടുത്താൻ ദേശസ്‌നേഹികൾ ഒറ്റക്കെട്ടായി നിൽക്കണമെന്നും ആഹ്വാനം ചെയ്തു.
