കൊച്ചി : മരക്കാർ സിനിമയെ അഭിനന്ദിച്ച് പ്രശസ്ത ചിത്രകാരൻ നമ്പൂതിരി . സിനിമ കണ്ട ശേഷം നമ്പൂതിരി മോഹൻലാലിനും പ്രിയദർശനും അയച്ച വോയ്സ് മെസേജും ലാലിന്റെയും പ്രിയന്റെയും മറുപടിയുമാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത് .
‘ മരക്കാർ’ സിനിമ കണ്ടു, അതി ഗംഭീരം. അതിനപ്പുറം പറയാനില്ല. എല്ലാ നന്മകളും നേരുന്നു സുഖമായിരിക്കുന്നതിൽ സന്തോഷം ‘ എന്നായിരുന്നു നമ്പൂതിരിയുടെ സന്ദേശം . ഇതിന് നന്ദി പറഞ്ഞ് മോഹൻലാലും ,പ്രിയദർശനും മറുപടി അയച്ചു. തന്നെ അനുഗ്രഹിച്ചതിൽ മനസു നിറയുന്നുവെന്ന് പറഞ്ഞ മോഹൻലാൽ ഏറെ തവണ അദ്ദേഹത്തെ സാർ എന്ന് സംബോധന ചെയ്യുന്നുണ്ട് . ഏറെ സന്തോഷമെന്നും മോഹൻലാൽ മറുപടി പറഞ്ഞു . . വായനയുടെ വസന്തകാലത്തു മനസിലേക്കു വന്ന രൂപങ്ങൾക്ക് ദൃശ്യരൂപം നൽകിയ ആളാണ് നമ്പൂതിരിസാർ എന്നാണ് പ്രിയദർശൻ പറഞ്ഞത് . വാക്കുകൾക്കൊപ്പം വരകളിലൂടെയും പലതും അദ്ദേഹം മനസിൽ കോറിയിട്ടുവെന്നും പ്രിയദർശൻ പറഞ്ഞു .
97 വയസ്സായി ആർട്ടിസ്റ്റ് നമ്പൂതിരി പതിറ്റാണ്ടുകളായി തിയേറ്ററിൽ പോയി സിനിമ കാണാറില്ല. എന്നാൽ ‘മരക്കാർ’ തിയേറ്ററിൽ പോയി തന്നെ കാണണമെന്ന് അദ്ദേഹത്തിനു നിർബന്ധമായിരുന്നു. മകൻ ദേവനൊപ്പം എടപ്പാളിലെ തിയേറ്ററിലെത്തി സിനിമ കണ്ടു. പോസ്റ്ററിനൊപ്പം നടന്നു ഫോട്ടോയും എടുത്താണ് മടങ്ങിയത് .
